Россиянең мәгариф министрлыгы мәктәпләрдә, көллиятләрдә һәм балалар бакчаларында куркынычсызлык чараларын көчәйтү буенча төбәкләргә тәкъдимнәр җибәрде
Россия Федерациясе мәгариф министры Сергей Кравцов Казан шәһәренең 175 нче гимназиясендә 11 майда булган фаҗигагә бәйле рәвештә мәгариф оешмаларында куркынычсызлык чараларын көчәйтү буенча төбәкләр өчен тәкъдимнәр белән хатка кул куйды. Документта белем алучыларның да, мәгариф оешмалары хезмәткәрләренең дә тормышын, сәламәтлеген саклауны тәэмин итүче кагыйдәләр бар.
"Россия Федерациясе субъектында хәлне анализлауны исәпкә алып өстәмә чаралар эшләргә, оешмаларның якланганлыгы торышына тикшерүләр уздырырга, педагогик коллективларда аңлату эшләрен оештырырга, канун тыңлаучан тотыш, гомуми мәктәп ата-аналар җыелышлары турында сыйныф сәгатьләре үткәрергә кирәк", - диелә документ текстында.
Россия мәгариф министрлыгы мәгариф объектларының 2019 елның 2 августындагы 1006 номерлы карары белән билгеләнгән террорчылыкка каршы яклануына таләпләрне тайпылышсыз үтәү зарурлыгына игътибар итә. Россия мәгариф министрлыгы тәкъдимнәре җентекле кризиска каршы эш планын кертә. Кризиска каршы команда эшчәнлеге тышкы консультант ярдәме белән тәэмин ителергә тиеш, ул команда формалаштыру, аны укыту стадиясендә дә, гадәттән тыш хәл вакытында да ярдәм күрсәтә. Тәкъдимнәрдә ачыкланганча, бу белгеч кризиска каршы бүлекчә яки шәһәр ашыгыч психологик ярдәм хезмәте вәкиле булырга тиеш.
"Кризислы ситуацияләрдә белем бирү оешмасының үз ресурслары еш кына җитәрлек булмый. Нәкъ менә шуңа күрә төбәк кризиска каршы бүлекчәләре белән эшне координацияләү кирәк ", - дип ассызыклана документта.