БДИны ничек тапшырачакбыз?

2012 елда россия мәктәпләрен тәмамлаучы чыгарылыш укучыларын Бердәм дәүләт имтиханнарын төзүчеләр әзерләгән күп кенә яңалыклар көтә. Алдан ук әйтеп куябыз – революцион үзгәрешләр булмаячак. Әмма кайбер предметлар буенча контроль-үлчәү материалларны ярыйсы гына яңартачаклар.

Укучылар информатикадан, тарихтан һәм математикадан БДИ контроль-үлчәү материаллары үзгәрәчәгенә әзер булып торырга тиешләр.

Тарих
Тарихтан имтиханның С өлешендә укучыларга инша язарга тәкъдим ителәчәк. – Бездә абсолют яңа бирем – тарихи портрет барлыкка килде, - дип аңлата тарих буенча Контроль-үлчәү материалларын төзүчеләр федераль комиссиясе башлыгы, Кемерово дәүләт университетының Ватан тарихы кафедрасы доценты Алексей Адаменко. - Өч тарихи эшлекле бирелә, укучы алар арасыннан берсен сайлап ала һәм аны кыскача сурәтли. Аның яшәү елларын, ни белән танылганлыгын, эшчәнлегенең нәтиҗәләре нинди булуын күрсәтә. Үзенә күрә шундый инша килеп чыга. Моннан тыш, өч өлеш буенча да биремнәр саны кыскартылды: элек 49 иде, хәзер 39 калачак. В өлешендә яңа вариантлар өстәлде: элек имтихан тапшыручыга дата белән шәхесне генә тиңләштерәсе иде, хәзер без тарихи вакыйгаларны да өстәдек. Шуны да әйтеп үтәргә кирәк, биремнәр саны кимеде, ә имтихан дәвамлылыгы кыскартылмады. Димәк, җавап әзерләргә вакыт күбрәк булачак.

Математика
Математикадан яңа мисаллар өстәләчәк. – 2012 елда математикадан БДИга беренчесен “Ихтималлылык һәм статистика” бүлеге буенча мисаллар кертәбез, - дип сөйли математика буенча Контроль-үлчәү материалларын төзүчеләр федераль комиссиясе башлыгы, Мәскәү өзлексез математик белем бирү үзәге директоры Иван Ященко. – Иң гади мисалларны бирәбез. Газеталар укыганда да, теләсә кайсы башка төр мәгълүмат белән эшләгәндә дә безнең барыбызга да ихтималлылык һәм статистика белән очрашырга туры килә. Бу тема вузларга укырга керергә баручылар өчен генә түгел.

2012 елда математикадан БДИга геометрия курсы буенча да бер мәсьәлә өстәләчәк.

Информатика
Информатика буенча контроль-үлчәү материалларында да биремнәр саны үзгәрде. Беренче өлештә биремнәр саны 18 дән 13 кә кадәр киметелде, икенче өлешендә 10 нан 15 кә кадәр арттырылды. Биремнәр саны “Алгоритмнар теориясе элементлары” һәм “Модельләштерү һәм компьютер эксперименты” бүлекләре буенча арттырылды, ә “Санау системалары” һәм “Логика нигезләре” бүлекләре буенча киметелде. График мәгълүматны эшкәртү мәсьәләсе тавышны эшкәртү мәсьәләсе белән алыштырылды.
.
БДИ-2012 кагыйдәләрендәге яңалыклар
Беренче тапкыр рус теле һәм математикадан БДИның минималь баллары (36 һәм 24) алдан ук игълан ителеп куелды. Вузлар үткәргән олимпиадаларның җиңүчеләре һәм призёрлары укырга кергәндә льготадан бары тик бер мәртәбә генә файдалана алалар. БДИ нәтиҗәләре Россиянең һәр вузына гаризалар биргәндә дә мәҗбүри. БДИ нәтиҗәләре язылган кәгазь белешмә хәзер кирәкми. Вузлар дкументларны кабул итеп алырга һәм күрсәтелгән нәтиҗәләрне Федераль база буенча чагыштырып карарга тиешләр.