Дворкович Казанда икътисадны диверсификацияләү юнәлешләрен билгеләде

Кичә РФ Президенты ярдәмчесе Аркадий Дворкович Казанда “Яшүсмерләр сигезлеге” Бөтенроссия конкурсында катнашучылар белән очрашуда Россия икътисадын диверсификацияләүнең өстенлекле юнәлешләрен билгеләде.
Очрашуда шулай ук Татарстан Президенты Рөстәм Миңнеханов, ТР мәгариф һәм фән министры Альберт Гыйльметдинов, Казан мэры Илсур Метшин катнашты.
Россия икътисадының нәрсә хисабына нәтиҗәлелекне арттыра һәм чималга бәйлелекне киметә алуына бәйле сорауга җавап биреп, Аркадий Дворкович Россия икътисадын диверсификацияләүнең өстенлекле юнәлешләрен билгеләде. РФ Президенты ярдәмчесенең сүзләренә караганда, бу - IT-сектор, авыл хуҗалыгы, нефть эшкәртү, авиакосмик тармак, фармацевтика, туризм һәм башкалар. Дворкович фикеренчә, Россия авыл хуҗалыгы өлкәсендә дөньякүләм лидерга әверелә, нефть эшкәртү белән тагын да интенсиврак шөгыльләнә, авиакосмик тармак өчен инженерларның яңа буынын әзерли ала.
“Иң мөһиме – без куелган максаттан читкә тайпылмаска тиешбез. Һәр төбәккә глобаль лидерга әверелү ихтималы булган урыннарны табарга кирәк. Туризмны гына алыйк – мөмкинлекләр бөтен җирдә дә күп. Мәскәү, Санкт-Петербург, Казан, Сочи, Карелия – бары тик кунакханәләр төзергә, аэропортларны яхшыртырга, яхшы туристик маршрутлар булдырырга гына кирәк. Бу очракта туризм чимал тармагы кебек үк әһәмиятле өлкәгә әверелергә мөмкин”, - дип белдерде Дворкович.
Үз чиратында, Рөстәм Миңнеханов нефтьне сату белән генә чикләнү дөрес булмавын билгеләп үтте. Шулай ук нефть продуктларын эшкәртү тармагын да үстерергә кирәк. ТР Президенты фикеренчә, Татарстанда җитештерелә торган полимерларның 30 проценты ТР предприятиеләрендә эшкәртелергә тиеш. “Бу гаять зур күләмдә өстәмә кыйммәт бирәчәк”, - дип ассызыклады ул.
ТР башлыгы күп кешене эш белән тәэмин итүче машина төзелеше, шулай ук авыл хуҗалыгының мөһим тармаклар рәтенә керүен билгеләп үтте. “Яшь белгечләр читкә китмәсен, бәлки үзләрен биредә тапсыннар өчен IT өлкәсендәге яңа юнәлешләрне үстрергә кирәк, - дип ассызыклады Р.Миңнеханов. - Әмма продукт көндәшлеккә сәләтле булырга тиеш. Шулай булгач фәнгә җитди игътибар бирү зарур. Әгәр без барысын да Көнбатыштан сатып алсак, һәрвакытта да ярты адымга артта булачакбыз. Безнең планнарыбыз бар, без аларны бергәләп гамәлгә ашыра алабыз”.