Бүген Казан яшьләренең 2 меңнән артыгы – имтиханда

Казан мәктәпләренең XI классын тәмамлаучы 6056 укучы өчен бүгеннән бердәм дәүләт имтиханы башлана һәм сынауларның төп “дулкыны” 21 июньгә кадәр дәвам иттерелә.
Аерым алганда, имтихан уздыру графигы түбәндәгечә: 28 майда чыгарылыш класслар информатика һәм информацион-коммуникацион технологияләр (ИКТ), биология, тарихтан белемнәрен күрсәтә (бүген 2 меңнән артык егет һәм кыз - сынауда); 31 майда – рус теленнән; 4 июньдә – чит телләр, химиядән; 7 июньдә – математикадан; 13 июньдә – җәмгыять белеме, физикадан; 16 июньдә – география, рус әдәбиятынан. 18-21 июнь исә резерв көннәр санала. Казанда имтиханнар 32 урында кабул ителә.
Шул рәвешле, тапшыруы мәҗбүри булган имтиханнар рус теленнән 31 майга һәм математикадан 7 июньгә билгеләнгән, аларны уңышлы уза алмаганнарга тулы урта белем алуы турындагы аттестат урынына укуы турында белешмә генә тапшырыла, яңадан БДИ тапшыру хокукы киләсе елга гына бирелә. Казан яшьләренең күпчелеге, 3273е, имтиханнардан җәмгыять белемен сайлаган, физиканы – 1790ы, Россия тарихын – 884е, биологияне – 714е, инглиз телен – 712се, химияне – 667се, информатиканы – 495е, рус әдәбиятын – 362се, географияне – 113е, немец телен – 30ы, француз телен – 14е һәм испан телен – 2се.
2011/2012 елгы уку елының алдан чыгарылган нәтиҗәләре һәм укучыларның БДИга әзерләнеше хакында бүген Казан каласы башкарма комитетында шәһәр җитәкчелегенең “эшлекле дүшәмбе” киңәшмәсендәге хисабында мәгариф идарәсе башлыгы Илсур Һадиуллин игълан итте. Аның сүзләренчә, быел югары уку йортына кергән чакта БДИ нәтиҗәләренең кимендә өчесен күрсәтү дә җитә, кәгазьдәге расланышы башка кирәк булмый: югары уку йортлары абитуриентның документларын кабул итеп, анда күрсәтелгән имтихан нәтиҗәләрен федераль таныклык базасы буенча тикшерергә тиеш була – яңа гына гамәлгә кертелгән тәртип шундый. Олимпиадаларда җиңүчеләр һәм призлы урын алучылар конкурстан тыш бары тик бер уку йортына бер белгечлеккә генә ташламалы шартларда керергә хокуклы, дип аңлатты И.Һадиуллин.