Бүген 11 нче сыйныфлар Бердәм дәүләт имтиханнарының мәҗбүриен – рус телен тапшырды

Бүген 11 нче сыйныфлар Бердәм дәүләт имтиханнарының икенчесен – рус телен тапшырды. Рус теле, математика белән беррәттән, мәҗбүри тапшыру өчен билгеләнгән предметлардан санала. Шул сәбәпле бу имтиханда катнашучылар саны да иң зурысы.
Бүген республикадагы 110 имтихан тапшыру пунктын 22 105 кеше ачып керде. Билгеле булганча, БДИның 21 июньгә кадәр дәвам итәчәк “төп дулкыны”нда 2012 елда һәм узган елларда мәктәп тәмамлаучылар, башлангыч һәм урта махсус һөнәри уку йортларын тәмамлаучылар; урта (тулы) гомуми белемне чит илләрдә алганнар сынау тота ала.
Быел Рособрнадзор тарафыннан рус теле буенча иң чик балл – 36, математика буенча 24 балл дип билгеләнде.
Бүген журналистларны Казанның 122 нче мәктәбендә БДИ тапшыруга әзерлек процессы белән таныштырдылар. Биредә Мәскәү һәм Киров районнары мәктәпләренең 221 укучысы имтихан бирә. Рус теленнән БДИ 3 сәгатькә исәпләнгән.
Рус теленнән имтихан иртәнге сәгать унда башланды. Имтиханга 10 минут кала, Дәүләт имтихан комиссиясе вәкиле – Казан дәүләт мәдәният һәм сәнгать университеты укытучысы һәм имтихан тапшыру пункты җитәкчесе, сейфны ачып, имтихан эшләрен алды һәм укучыларга таратты. Имтихан эшләре бүген иртән генә мәктәпкә китерелгән. Имтихан тапшыру пункты җитәкчесе имтихан эшләре бозыла калган очракта, өстәмә экземплярлар да китерелүен хәбәр итте.
ТР Мәгариф һәм фән министрлыгының белем бирү сыйфатын тикшерү һәм укучыларны аттестацияләү бүлеге җитәкчесе Лилия Әмирова хәбәр иткәнчә, рус теленнән һәм математикадан имтихан тапшырганда кесә телефоны яки шпаргакалар кулланып тәртип бозган укучыларны куып чыгарсалар, БДИны кабат тапшырып карау мөмкинлеген Дәүләт имтихан комиссиясе генә хәл итә ала. Алар урта белем турында аттестатсыз да калырга мөмкин.
“28 майда без информатика, биология һәм тарихтан имтихан уздырган идек. Имтихан вакытында Мөслим, Арча һәм башка районнардан тәртип бозучылар булганлыгы ачыкланды. Алар арасында кесә телефоныннан, белешмә материаллардан кулланучылар, имтихан эшен Интернетка җибәрүчеләр дә бар. Бу очрак уңаеннан без 29 нчы июнь көнне Дәүләт имтихан комиссиясен җыйдык. Комиссия тәртип бозган балаларның нәтиҗәләрен юкка чыгару турында карар кабул итте. Алар хәзер бу юнәлешләр буенча югары уку йортларына укырга керә алмаячак”, - дип белдерде Лилия Әмирова.
Быел укучыларга 14 предметтан сынау бирергә тәкъдим ителә. 4 июньдә – чит телләр, химиядән; 7 июньдә – математикадан; 13 июньдә – җәмгыять белеме, физикадан; 16 июньдә – география, рус әдәбиятыннан имтиханнар куелган. 18-21 июнь - резерв көннәр.