Бүген тугызынчылар сайлап алу предметлары буенча “кече БДИ” тапшыра

Бүген тугызынчылар сайлап алу предметлары буенча “кече БДИ” тапшыра. 2011-2012 уку елында тугызынчы сыйныфны республикада – 37542, Казанда 9625 кеше тәмамлый.
РФ Мәгариф һәм фән министрлыгының Белем бирү һәм фән өлкәсендә күзәтчелек буенча федераль хезмәте хәбәр иткәнчә, укучылар 1 июньдә Россия тарихыннан, җәмгыять белеменнән, физикадан, химиядән, географиядән, биологиядән, чит телләрдән (инглиз, француз, немец, испан), рус әдәбиятыннан, информатика һәм информацион-коммуникатив технологияләрдән; 5 июньдә – рус теленнән имтихан тапшыра.
ТР Мәгариф һәм фән министрлыгы үз вәкаләтләре кысаларында 11 июньдә яңа формада татар теленнән имтихан тапшыруны да кертте.
2012 елда татар теленнән имтиханны яңа формада тапшыруны кертүнең максаты укучыларның татар телен – туган тел һәм дәүләт теле буларак ни дәрәҗәдә үзләштерүен ачык һәм объектив бәяләү практикасын кертү белән бәйле. Моңарчы да тугызынчы тәмамлаганда татар теленнән имтихан тапшыру мәҗбүри иде. Әмма сынаулар традицион формада гына узды.
Татар теленнән имтиханны традицион формада тапшыруның берничә юлы бар. Мәсәлән, туган (татар) телендә белем алган укучылар - сочинение элементлары белән изложение, рус телендә белем алган татар телле укучылар диктант яки изложение яза ала. Ә рус телле укучылар билетлар буенча сынау тотачак.
14 июньдә кабат Россия тарихы, җәмгыять белеме, физика, химия, география, биология, чит телләр (инглиз, француз, немец, испан), рус әдәбияты, информатика һәм информацион-коммуникатив технологияләр куелган.
16 июнь – өстәмә көн. Бу көнне рус теленнән, җәмгыять белеменнән, биологиядән, физикадан, информацион-коммуникатив технологияләрдән сынау тотып була.
18 июнь – өстәмә көн. Бу көнне математикадан, Россия тарихыннан, химиядән. Географиядән, чит телләрдән, рус әдәбиятыннан имтихан тапшырырга мөмкин.
Гомумән алганда, быел тугызынчыларга имтиханнарны тестлар рәвешендә һәм традицион формада тапшыру мөмкинлеге бирелә. Алай да рус теле һәм математикадан укучылар сынауны тестлар ярдәмендә язма рәвештә генә бирә алачак. Алар Бердәм дәүләт имтиханын тапшыру өчен төзелгән контроль-исәпләү материалларына (КИМ) охшаш. Укучылар бу имтиханнарны махсус имтихан кабул итү пунктларында бирергә тиеш булачак. Аларның эшен җәмәгать күзәтчеләре дә күзәтеп торачак. Бу укучыларны тестлар ярдәмендә эшләргә, алардан курыкмаска өйрәтү өчен эшләнә.
Яңа формада (“кече БДИ”) дәүләт (йомгаклау) аттестациясен үткәрүнең өстәмә сроклары 22-27 июньгә куелган.