Казанда IT-лицей ачылды

Казан федераль университеты базасында махсус IT-лицей ачылды. Бу - якын киләчәктә республикада инновацион технологияләр өлкәсе белгечләре, әлеге юнәлеш буенча профессионаллар бермә-бер артачак, дигән сүз. Лицейны булдыру идеясе туганга бик аз вакыт узуга да карамастан, ул тиз арада тормышка ашырылды. Лицей 7 нче, 8 нче сыйныфка баручы 144 укучы өчен үзенең ишекләрен ачты. Әлеге тантаналы вакыйгада Татарстан президенты Рөстәм Миңнеханов та катнашты.«Безнең төп максат — конкурентлыкка сәләтле кадрлар булдыру, республикада актив үсеп килүче инновацион технология базарын югары квалификацияле белгечләр белән тәэмин итү. Алар — илебезнең киләчәге булып формалашсыннар иде. Киләчәктә әлеге укучылардан галимнәр, эшмәкәрләр, Россия өчен кирәк һәм кыйммәт булган белгечләр чыгачагына мин чын күңелдән ышанам», дип белдерде республика башлыгы үзенең сәламләү чыгышында. Аның фикеренчә, әлеге лицей бик дөрес юлда. «Киләчәктә аны тагын да камилләштерү, үстерү күздә тотыла. Укучылар белән үз эшенең остасы булган, югары квалификацияле укытучылар эшләячәк. Әлеге эшчәнлеккә чит ил белгечләрен дә тартачакбыз», дип уртаклашты Рөстәм Миңнеханов. КФУ ректоры Илшат Гафуров, иң беренче чиратта, балаларның әти-әниләренә рәхмәт сүзләре җиткерде. «Шундый акыллы, тырыш балалар тәрбияләгәннәре, аларны безнең лицейга китергәннәре өчен ата-аналарга зур рәхмәт әйтәсем килә. Бу балалар беркайчан да югалмаячак, барысы да үз юлларын табып, уңышка ирешәчәкләр», дип ышандырды ректор. Аның сүзләренә караганда, киләчәктә әлеге уку йорты «Президент лицее» исемен алырга мөмкин. Ник дигәндә, аны булдыру идеясен нәкъ менә Рөстәм Миңнеханов җиткергән икән. Башта лицейда теләге булган һәркем укый алачак дисәләр дә, нәтиҗәдә анда бары тик егетләр генә белем алырга тиеш, дигән фикергә килгәннәр. Бактың исә, кызлар һәм егетләр аерым укыганда уку-укыту процессы яхшырак нәтиҗә бирә икән.Тестлардан күренгәнчә, ир балалар кызларга караганда күбрәк тә, акыллырак та булып чыккан. Ә сайлап алу бәйгесенә килгәндә, ул өч этапта үткәрелгән. Башта лицейга укырга керергә теләүчеләр КФУ сайтында махсус тест узганнар. Анда 11 меңнән артык бала катнашкан. Аннары исә, лицей укытучылары төрле районнар, шәһәрләр буйлап йөреп, математика, логика һәм бер сайланма предмет буенча тест үткәргәннәр. Иң яхшы дип табылганнарны исә, Казанга чакырганнар. Өченче этап лицейда узган. Укучылар 3 көн буе шушында яшәп, ашап, дәресләргә йөреп үзләрен күрсәткәннәр. «Нәтиҗәдә, без Татарстан һәм бөтен Россиядән «иң-иң» дип табылган укучыларны сайлап алдык. Берничә елдан аларны кыйммәтле абитуриентлар итеп тәрбияләп чыгарачакбыз», дип ышандырды лицей директоры Ирек Фәтхетдинов.
Фото http://prav.tatarstan.ru сайтыннан