Яшь татарстанлыларны «Россиянең туган телләре» акциясендә катнашырга чакыралар

Халыкара туган тел көне уңаеннан РФ Мәгариф министрлыгы «Россиянең туган телләре» дигән акция башлый.

Акциядә төрле яшьтәге мәктәп укучылары – коллектив белән дә, аерым да катнаша ала. Аның шартлары буенча туган телдә әти-әниең, кече Ватаның яки тарихи вакыйга турында шигырь сөйләргә һәм шуны камерага яздырырга кирәк. Шуннан соң роликны #РодныеЯзыкиРоссии хештегы белән социаль челтәрләргә урнаштырасы гына кала.

Барлык видеоязмалар да министрлыкның туган телләргә ярдәм күрсәтү һәм аларны үстерүгә багышланган сайтында интерактив лентада урын алачак.

Акциягә 21 февральдә – Халыкара туган тел көнендә нәтиҗә ясау күздә тотыла. Җиңүчеләргә - истәлекле бүләкләр, ә һәр катнашучыга исемле сертификат тапшырылачак.