Мәгълүмат куркынычсызлыгы буенча Innopolis Open олимпиадасы финалы дистанцион форматта узачак

2020 елның 20 марты, җомга

Эпидемиологик вәзгыять белән бәйле рәвештә, Иннополис Университетының Югары уку йортына кадәр әзерлек үзәге ярышларның финалын дистанцион технологияләр кулланып уздырачак.
Ярышларда Россиянең 27 төбәгеннән, Испаниядән, Беларусь, Сербия һәм Казахстаннан  85  җиденче-унберенче сыйныф укучысы катнашачак. Бу ике сайлап алу онлайн-турларында җиңүчеләр һәм узган елгы олимпиадада иң яхшы нәтиҗәләр күрсәткән катнашучылар. Йомгаклау этабы 24-28 мартта узарга тиеш иде, ләкин, коронавирус таралу куркынычы янау сәбәпле, укучылар массакүләм чараларда катнаша алмый. Innopolis Open финалын уздыруның яңа даталары соңрак билгеле булачак.