"Сириус" барлык укучыларны онлайн-олимпиадага чакыра
"Сириус" мәгариф үзәге мәктәп укучыларының Бөтенроссия олимпиадасы чакыру этабын онлайн-форматта уздыру буенча Мәскәү инициативасын хуплады.
Олимпиада 20 апрельдән 27 майга кадәр "Сириус" платформасында онлайн узачак. Олимпиада үткәреләчәк фәннәр: математика, информатика, химия, физика, биология һәм астрономия. Анда 4-10 сыйныф укучылары катнаша ала. Ә математика буенча олимпиадада 3 сыйныфлар да көчен сынап карарга мөмкин. Мәсьәләләрнең катлаулылыгы Бөтенроссия олимпиадасының мәктәп этабындагы кебек булачак. Аларны "Сириус" һәм Мәскәү педагогик осталык үзәгенең әйдәп баручы экспертлары эшләде.
Ничек гариза бирергә? "Сириус" үзәге сайтына керергә - теркәлергә, бер яки берничә предметны сайларга. Турлар үткән көннәрдә сылтама буенча күчәргә кирәк, ул шәхси кабинетта ачылачак.
Нәтиҗәләр тур үткәннән соң ике атна дәвамында билгеле булачак. Олимпиада нәтиҗәләре буенча укучылар "Сириус"тан үзләре өчен киләчәктә уку һәм үсеш буенча киңәшләр алачак. Һәм иң мөһиме-алар киләсе дистанцион программаларга чакырылачак.