Энгель Фәттахов: “Республиканың белем бирү системасы белән идарә итүдә анык вертикаль төзү зарур

“Мин тәртип яратам. Республиканың белем бирү системасы белән идарә итүдә анык вертикаль төзү зарур. Безгә кемнең нәрсә өчен җавап бирүен төгәл билгеләргә кирәк. Эшебезнең ахыргы нәтиҗәсе өчен һәр җитәкченең җаваплылыгын берничә тапкыр арттырырга тиешбез. Киләчәктә бергә булып, бердәм булып эшләргә язсын”, - диде бүген ТР Мәгариф һәм фән министры Энгель Фәттахов министрлыкның Яр Чаллыда узган еллык коллегиясендә.
“Президент, шул ук вакытта Хөкүмәт җитәкчесе бу вазыйфаны миңа ышанып тапшырган икән, мин инде эшләргә дип килдем. Мин начар итеп эшләргә яратмыйм. Сездән дә шуны таләп итәсем килә”, - дип белдерде министр.
Министр үз чыгышында муниципаль дәрәҗәдә белем бирү белән идарә итү органнары эшчәнлеген оештыру мәсьәләләренә дә тукталды. Ул урыннардагы методик берләшмәләрне белем бирү идарәләре белән берләштерергә тәкъдим итте. Район башлыкларына мөрәҗәгать итеп, бу очракта идарәче кадрларны туплаудагы һәм эшләтүдәге җаваплылыкның берничә тапкыр артуын белдерде. Бер үк башкару сәбәпле, урыннардагы карарларның министрлык фикерен исәпкә алып, кабул ителергә тиешлеген ассызыклады.
“Республиканың белем бирү белән идарә итү системасын үзгәртеп кору көтелә. Безнең тарафтан муниципаль дәрәҗәдә контроль функцияләрне үтәүне норматив-хокукый яктан җайга салу механизмы эшләнде. Бер үк вакытта муниципаль мәгариф бүлекләре һәм мәгариф идарәләре башлыклары һәм аларның урынбасарлары, информацион-методик үзәкләр директорлары хезмәт хакын арттыру мәсьәләсе хәл ителәчәк. Мәгариф идарәләре башлыкларын яңа җиңел машиналар белән тәэмин итү мәсьәләсе хәл ителде. Моның өчен ТР Президенты Рөстәм Нургали улы Миңнехановка рәхмәтебезне белдерәбез”, - диде министр.
Министр фикеренчә, урыннарда мәгариф белән бер хуҗа идарә итәргә тиеш. Мәгариф бүлекләренә һәм методик берләшмәләргә мәктәпләрдәге фронталь тикшерү һәм анализ ясау функцияләрен дә кире кайтарырга тәкъдим итте Э.Фәттахов.
Ул, шулай ук республикада һөнәри белем бирү системасын үстерү мәсьәләләренә тукталып, республика җитәкчелеге тарафыннан ТР Хезмәт, мәшгульлек һәм социаль яклау министрлыгына, ТР Авыл хуҗалыгы һәм азык-төлек министрлыгына караган һөнәри уку йортларын ТР Мәгариф һәм фән министрлыгына тапшырылуын хәбәр итте.
“Шулай итеп, ТР Мәгариф һәм фән министрлыгы республиканың һөнәри белем бирү системасы өчен җаваплы үзәгенә әйләнә. Безнең алда һөнәри белем бирү системасын реформалаштыру, белем бирү программаларын һәм техник базаны яңарту буенча чаралар тора. ТР Хезмәт, мәшгульлек һәм социаль яклау министрлыгы белән берлектә һөнәри белем бирү системасы өчен кадрлар әзерләү буенча эшкә сәләтле системаны булдыру зарур”, - дип белдерде Э.Фәттахов.
Ул республикада 2013-2020 елларга һөнәри белем бирүне үстерү буенча дәүләт программасы кабул ителүен, министрлыкның бу үз юнәлештәге программасы булырга тиешлеген ассызыклап үтте.
Фото http://prav.tatarstan.ru сайтыннан