“Хәзерге шартларда рухи-әхлакый тәрбия бирүдә Ризаэддин Фәхреддин мирасын файдалану” темасына X республикакүләм педагогик укулар

Татарстан Республикасы мәгариф һәм фән министрлыгының еллык планы нигезендә күренекле татар мәгърифәтчесе, педагог Ризаэддин Фәхреддиннең иҗади мирасын өйрәнү, яшь буынга рухи-әхлакый тәрбия бирүдә галимнең хезмәтләрен пропагандалау максатында, 2013 нче елның 14 нче февралендә Кукмара муниципаль районында “Хәзерге шартларда рухи-әхлакый тәрбия бирүдә Ризаэддин Фәхреддин мирасын файдалану” темасына X республикакүләм педагогик укулар үтә.
Укуларда Татарстан Республикасы Президент Аппараты, Русия гадел - хөкем академиясе, республика массакүләм матбугат чаралары вәкилләре, Казан федераль университеты укытучылары, Татарстан Республикасы районнары-шәһәрләреннән милли мәгариф эшләре өчен җаваплы мәгариф бүлеге, мәгълүмати – методик үзәк белгечләре һәм татар теле һәм әдәбияты укытучылары, дини культура һәм дөньяви этика нигезләре фәне укытучылары, Удмуртия Республикасы, Киров өлкәсе татар мәктәпләре вәкилләре катнашачак.
Конференциядә Ризаэддин Фәхреддин хезмәтләренең кыйммәтен барлап, аның иҗади мирасын рухи һәм әхлакый тәрбия бирү процессында киң файдалану мәсьәләләре карала. Әлеге шәхеснең халык педагогикасына, ислам- әхлак кагыйдәләренә нигезләнеп язылган хезмәтләре аша яшь буында толерантлык хисе тәрбияләү юллары күрсәтеләчәк.
Пленар утырышта мәгариф һәм фән министры Энгель Фәттахов, Татарстан Республикасы Президенты Аппаратының дини берләшмәләр белән багланышлар идарәсе башлыгы Илнур Гатауллин, Русия гадел-хөкем академиясе профессоры, тарих фәннәре докторы Айдар Хабетдинов, Казан федераль университеты профессоры, дәреслек авторы, академик Хатып Миңнегулов һәм башкалар чыгышы планнаштырыла.
Әлеге чарада катнашучылар Кукмара муниципаль районы мәгариф учреждениеләре педагогик коллективларының Ризаэддин Фәхреддин мирасын рухи һәм әхлакый тәрбия өлкәсендә куллану тәҗрибәсе белән танышачаклар.
Конференциягә кабул ителгән карар районнарга таратыла.