Казанда район мәгариф бүлекләре башлыклары һәм мәгълүмат-методика үзәкләре директорлары өчен Educare Сингапур компаниясенең мастер-класслары башланды

Казанда район мәгариф бүлекләре башлыклары һәм мәгълүмат-методика үзәкләре директорлары өчен Educare Сингапур компаниясенең 3 көнлек мастер-класслары башланды.
2013-2015 нче елларда ТР мәгариф һәм фән министрлыгы Сингапур белгечләре белән бергә республиканың мәктәп укытучыларына методик ярдәм итү системасын модернизацияләү буенча зур проектны тормышка ашырырга планлаштыра. Әлеге проект кысаларында белем бирүнең заманча инновацион методикаларына өйрәтүне Татарстан мәктәпләренең якынча 30 мең укытучысы узачак, монда ТР районнарындагы мәгълүмат-методика үзәкләре төп рольне уйнаячак.
ТР мәгариф һәм фән министры Энгель Фәттахов үзенең сәламләү сүзендә проектның ТР Президенты Рөстәм Миңнеханов йөкләмәсе буенча һәм 2013 нче елда ТР мәгарифен үстерү стратегиясе кысаларында тормышка ашырылуын билгеләде. Э.Фәттахов искәртүенчә, ведомство Educare компаниясе белән инде 3 нче тапкыр хезмәттәшлектә эшли: 2011-2012 нче елларда Казанның алдынгы мәктәпләре укытучыларының квалификацияләрен арттыру буенча проектлар тормышка ашырылган. Ике елда 500 укытучы белем алган, аларның күбесе тьютор булган һәм үз тәҗрибәләрен хезмәттәшләре арасында тарата.
“Такта янында материалны әйтеп тора торган укытучы бердәнбер игътибар үзәге булган сыйныф бүлмәсеннән әкренләп китәргә кирәк, - дип ышана Э.Фәттахов. – Дөнья бик тиз үзгәрә, һәм бүген балаларыбызны кайчандыр укытучылар әйткәнне кабатларга түгел, ә мөстәкыйль рәвештә белем эзләргә өйрәтергә кирәк. Укытучы укучыларга иртәгә үк актуальлеген югалтырлык соңгы белемнәрне бирмәскә, ә технологияне бирергә һәм аны ничек кулланырга икәнлеген өйрәтергә тиеш”.
Educare Сингапур компаниясе җитәкчесе Майк Туриман сүзләренчә, алар 3 көн дәвамында район мәгариф бүлекләре башлыклары һәм мәгълүмат-методика үзәкләре директорларына мәгариф системасында үзгәрешләрнең ни өчен кирәклеген аңлатырга тырышырачак.
Майк Туриман фикеренчә, әгәр дә мәгариф системасы хезмәткәрләре яңалыкка ачык булсалар, практикада яңа технологияләрне кертүе кыен түгел. “Казанда ике ел дәвамында бу технологияләрне кулландылар: инде 480 укытучы моның Россия һәм Татарстан шартларында эшләвен күрсәтте. Хәзер бу тәҗрибәне бөтен республикага, һәрбер районга таратырга кирәк, - дип саный М.Туриман. – Безнең бик яхшы укытучылар, һәм яхшы мәктәпләр бар. Ләкин 80 нче елларда укыткан кебек белем бирүче укытучылар да бар. Төп проблема – бер укытучыларның тәрҗрибәсен башкаларга таратуның булмавы һәм көчсез укытучыларга көчле укытучылардан ярдәм күрсәтелмәве”.
Сингапурдагы мәгариф системасы турында сөйләгәндә, Майк Туриман аңа мәгариф министрлыгы, хөкүмәт, җәмгыять ягыннан системалы ярдәм күрсәтелүен билгеләде. Укытучыларны эшкә алуга, аларның квалификацияләрен арттыруга, мәктәп директорларын әзерләүгә һ.б. игътибар бирелә.
Мастер-класслар белән бергә компетенция мәктәп-үзәкләре, шулай ук педагогия көллиятләре һәм КФУ укытучылары өчен квалификацияләрен арттыру курслары үтә.
Район мәгариф бүлекләре башлыклары һәм мәгълүмат-методика үзәкләре директорлары өчен мастер-класслар – быел Татарстанда Educare компаниясе белән бергә уздырыла торган чараларның берсе генә. Июнь аенда педагог-тренерлар сыйфатында эшләү өчен укытучы-осталарны өйрәтү була, июль-августта муниципаль берәмлекләр мәгълүмат-методика үзәкләре белгечләрен һәм ТР компетенция-мәктәпләре укытучыларын өйрәтү була. Моннан тыш, сентябрь-декабрьда мәгълүмат-методика үзәкләре белгечләре Educare контроле астында 10 мең укытучыны укытачак һәм тренинглар уздырачак.