КДЭУ да өйрәнү подстанциясе төзелешенә старт бирелде

Казан дәүләт энергетика университеты биләмәсендә, өйрәнү подстанциясе төзелеше өчен нигезгә капсула салу тантанасы узды. Полигон төзелешенә старт бирү чарасында Татарстанның Мәгариф һәм фән министры Энгель Фәттахов, КДЭУ ректоры Эдвард Абдуллаҗанов, төзелеш эшенә үз өлешен кертергә җыенучы оешма җитәкчеләре, вузның студент төзелеш отряды вәкилләре катнашты.
“Әлеге вакыйга Казан дәүләт энергетика университеты үсеше өчен зур әһәмияткә ия вакыйга. Әлеге полигон Россиядә бердәнбер”, - дип, Эдвард Абдуллаҗанов, инициативаны хуплап, ярдәм күрсәткән өчен республика җитәкчелегенә рәхмәтен җиткерде.
Ректор чыгышында билгеләп узганча, подстанция заманча җайланмалар белән җиһазланачак. Аның төзелешен агымдагы елның июненә төгәлләү ниятләнә. Проект “КЭР-Холдинг”, “Ресурс-Холдинг”, “Инвент Электро”, “Сетевая компания” кебек иганәче компанияләр хисабына да гамәлгә ашырыла. Төзелешкә шулай ук Россия һәм чит ил ширкәтләре акча бүлеп биргән, полигон артыннан тәүлек буе күзәтү куелачак.
“Подстанция 110/10 кВ” өйрәнү-җитештерү полигоны җиһазы бәясе берничә дистә миллион сумга җитә. Эдвард Абдуллаҗанов әйтүенчә, әлегә бу уникаль лаборатория КДЭУ һәм Казан энерготехникумы студентлары өчен генә дип төзелә. “Тәҗрибә туплау өчен илнең башка уку йортларыннан килергә теләк белдерүчеләр өчен безнең ишекләр ачык”, - диде ректор. Әйтергә кирәк, әлеге подстанциянең һөнәри ориентацияне көчәйтү өчен дә әһәмияте зур булачак. КДЭУ студентларының белемнәрен практикада ныгыту, энергетика тармагы һәм сәнәгый предприятие хезмәткәрләрен яңадан әзерләү, фәнни тикшеренүләр өчен ул зур роль уйнаячак. Подстанциядә шулай ук лаборатор дәресләр үткәрергә мөмкин булачак.
Эдвард Абдуллаҗанов искәртеп узганча, гамәлдәге подстанцияләрдә көчәнеш 110 мең вольтны тәшкил итсә дә, куркынычсызлыкны күздә тотып, өйрәнү полигонында ул 230 вольт кына булачак.
Яңа техникадан тыш, полигонда иске җиһазлар да куелачак. Бу студентларга, энергетика тармагының ни рәвешле үсеш алуын чагыштырып бәяләү йөзеннән эшләнә.
Тантанада булган рәсми затлар һәммәсе дә подстанция нигезенә капсула салуда катнашты.