Тәтеш районы укучылары республикакүләм бәйгедә уңышка иреште
Тәтеш районының Олы Тархан мәктәбе укучылары барлык каршылыкларны җиңеп, финалга чыкты.
Балалар һәм аларның җитәкчеләре әйтүенчә, алар өчен бу көтелмәгәнчәрәк булган, чөнки зур шәһәрләрдәге мәктәпләр белән ярышу чынлап та авыр. Бәйге биш белем блогын үз эченә алган. Мәктәп укучылары бәйге биремнәрен үтәп, команданың видеокүренешен әзерләгәннәр, үзидарәнең социаль проектын тәкъдим итүне әзерләгәннәр, шул исәптән инфографиканы да файдаланганнар (аларның проект сыйфатында “Олы тәнәфес” дигән мәктәп гәҗите алынган), мәктәпнең Инстаграм-аккаунтында туры эфирда тормыш иминлеге нигезләре укытучысы Равил Бускин белән аның “Олы Тарханның танылган йөз солдаты” исемле китабы турында әңгәмә корганнар, ә мәктәпнең укучылар үзидарәсе президенты Данил Куркин уртак проектны “Зум” мәйданчыгы аша яклаган.
“Әлеге абруйлы республика бәйгесендә катнашырга 122 команда чакырылган иде, күпчелеге – шәһәрнекеләр – дип уртаклашты Олы Тархан урта мәктәбе директоры Расих Шагаев. – Район данын яклауны авылыбыз мәктәбенең педагог-оештыручысы Фәния Рәхмәтуллина җитәкчелегендәге активистларга ышанып тапшырдык. Ярышның йомгаклау этабында җиңүче 6 команда билгеле булды, алар арасында безнекеләр дә бар. “Ышанычлы старт!” номинациясендә балаларга уңыш елмайды. Алар бердәм, дус команда булуларын расладылар – Миләүшә Әбелханова, Сергей Егоров, Ранис Исхаков, Данил Куркин, Салават Минаҗев, Дарья Россеева, Далер Сидиков, Ильмир Чумарин лаеклы чыгыш ясадылар. Безнең “Бергәләп сәләтле!” дигән шигаребез үзен аклады”.