Спас районында тәрбиячеләр арасында иҗади ярышлар башланды
Татарстанның Спас районында «Ел тәрбиячесе»һөнәри осталык конкурсының муниципаль этабы башланды. Беренче көнне шәһәр балалар бакчаларының дүрт тәрбиячесе башка төркем балалары белән дәресләр үткәрде.
Тәрбиячеләр уеннар, җырлар һәм биюләр тәкъдим иттеләр, мәктәпкәчә яшьтәге балаларга әкият геройларын искә төшерергә ярдәм иткән төрле методлар һәм алымнар күрсәттеләр. Шулай ук балалар педагоглар белән бергә рәсемнәр буенча әкият иҗат иттеләр, татарча сөйләшергә өйрәнделәр, келәй һәм тоз ярдәмендә кышкы агач ясадылар. Ә аш тозы белән тәҗрибә балаларга су тутырылган бер стакан өслегенә чи бәрәңге кисәген күтәрергә ярдәм итте.
«Родничок» катнаш балалар бакчасының татар теле укытучысы Гөлназ Рәхимова конкурста беренче тапкыр катнашуын һәм бераз дулкынлануын сөйләде.
«Рус балаларын татарча сөйләшергә өйрәтү өчен кызыклы ысуллар табарга тырышам. Соңгы вакытта, мәсәлән, Деньенеш һәм Кюизенер методикалары белән кызыксындым», — дип уртаклашты тәрбияче. Алда конкурсантларның мастер-класслары һәм аларга нәтиҗәләр ясау көтелә, ә җиңүчеләр соңрак билгеле булачак.