Татарстанлыларны татар телен өйрәнү буенча бушлай курсларга чакыралар

2021 елның 29 гыйнвары, җомга

Теләге булган һәркем татар теле буенча «Ана теле» онлайн-мәктәбендә белем алырга мөмкин. Укыту материаллары грамматиканы, лексиканы, фонетиканы өйрәнү өчен дәресләрдән, видеофильмнардан, аудиороликлардан тора.

Түләүсез онлайн-мәктәп ТР Президенты Рөстәм Миңнеханов инициативасы буенча 2013 елда төзелгән. Онлайн-мәктәптә катлаулылык буенча дүрт дәрәҗә каралган: А1, А2, B1, B2. Проект 72 бүлектән, 288 дәрестән, 1676 күнегүдән, 288 видеоклиптан, 10950 аудиофайлдан тора.

2013 елдан онлайн-мәктәпне 142 илдән 150 меңнән артык укучы узды, 8 млн нан артык уку сәгате, 5 млн дәрес һәм 80 меңнән артык сөйләшү дәресе үткәрелде, дип хәбәр итә оештыручылар.

Проектка теләге булган һәркем кушыла ала, сайтта теркәлү узу җитә.