Минзәлә интернат-мәктәбендә "Кошлар көне" бәйрәме узды

2021 елның 29 марты, дүшәмбе

Халыкара кошлар көнен бәйрәм итү кысаларында Минзәлә интернат-мәктәбендә “Кошлар — безнең дуслар” дигән ачык чара узды.

Анда ятим балалар өчен оешмада тәрбияләнүчеләр, Минзәлә урман хуҗалыгы директоры урынбасары Алмаз Нуриев һәм участок урманчысы Рәмис Вәлиев катнашты. Балалар төбәктә яшәүче канатлы тереклек ияләренең — иң кечкенәләрдән алып иң зур кошларның тормышы турында белделәр, шулай ук аларга безнең якларда кышлаучы һәм яз килү белән очып килүче кошлар турында сөйләделәр.

Бәйрәмнең кульминациясе интернат-мәктәп территориясендә урнашкан агачларга сыерчык ояларын элү булды. Хәзер канатлы дуслар учреждениенең еш кунаклары булачак.