2021 елда Казанда сигез балалар бакчасы төзеләчәк
Казанда быел гомуми сыйдырышлылыгы 1,6 мең урыннан артык булган сигез мәктәпкәчә учреждение төзеләчәк. Бу хакта эшлекле дүшәмбедә Казан башкарма комитетының мәгариф идарәсе башлыгы Ирек Ризванов сөйләде.
«Быел гомуми сыйдырышлылыгы 1 мең 690 урынлы 8 мәктәпкәчә учреждение төзү планлаштырыла. Шулардан биш балалар бакчасы "Демография" илкүләм проекты кысаларында, ә өчесе – "Торак һәм шәһәр мохите" илкүләм проекты буенча төзелә ", – диде Ризванов. Балалар бакчалары Константиновка поселогында, "7 небо" торак комплексында һәм "Җәй" торак комплексында төзеләчәк.
Бүген Казан миллионлы шәһәрләр арасында, Мәскәү һәм Санкт-Петербургтан кала, балалар бакчалары һәм мәктәпләр төзү буенча лидер булып тора.
"Кызганычка, хәтта интенсив төзелеш тормышка ашырылса да, ул халыкның үсеш темпларын куып җитә алмый", – дип билгеләде спикер. Россиядә 2019 елдан Россия Президенты Владимир Путинның "май указлары" нигезендә эшләнгән "Демография" илкүләм проекты гамәлгә ашырыла.