Татарстанда «Тоталь диктант»та рекордлы санда кеше катнашты
Татарстанда "Тоталь диктант" акциясендә катнашучылар саны 2021 елда рекордлы булды. Барлыгы 11 меңнән артык кеше гариза биргән, әмма чарада күпкә күбрәк кеше катнашкан. Бу хакта “Татар-информ” мәгълүмат агентлыгы хәбәрчесенә ТР Иҗтимагый палатасының Мәдәният комиссиясе рәисе урынбасары Ирина Александровская сөйләде.
«Инде беренчел гаризалар буенча 11 меңнән артык катнашучы бар иде. Әмма инде урыннарда бик күп теркәлмәгән кешеләр дә килүен исәпкә алып, бу сан үсәчәк. Әмма рекордны инде узып киттек", - дип ышана Ирина Александровская.
Текстның авторы быел язучы Дмитрий Глуховский булды, аның романы буенча 2019 елда "Текст" исемле фильмы чыкты. Нәкъ менә шушы замандаш язучы тарафыннан төзелгән тарих буенча диктант язу яшьләргә аеруча ошады, дип билгеләп үтте А.С.Пушкин исемендәге мәдәният үзәгендә «Тоталь диктант» мәйданчыгы кураторы Салават Галиев.
"Казанда мәйданчыклар күбәйде, "Тоталь диктант" үсеше популярлашты. Катнашучылар саны арта, төрле катлаулар, төрле яшь төркемнәре катнаша башлады. Яшьләр өчен "Метро 2033" китабы Глуховскийның яңа Россия әдәбиятыннан иң текә китабы булды, - диде Галиев.
Дикторларның берсе – ТР халык артисты Илья Славутский ассызыклаганча, акция искиткеч һәм дөрес, әмма шул ук вакытта рус телен һәм әдәбиятын популярлаштыру өчен рус әдәбиятының иң яхшы үрнәкләрен алырга кирәк. А.С.Пушкин исемендәге мәдәни үзәктә акция ике бинада узды. Яшьләр студиясендә текстны ТР Дәүләт Советының мәгариф, мәдәният, фән һәм милли мәсьәләләр комитеты рәисе урынбасары Людмила Рыбакова укыды. Элек ул акциягә катнашучы сыйфатында кушылды, ә быел беренче тапкыр аның дикторларының берсе булды.
"Бу бик әһәмиятле акция. Без диктант яздык кына түгел. Без бу текст эченә күмелдек, бүген без диктантта укыган әсәрне инде тулаем укыйсы килә. Без барлык кешеләребезне классиканы да, безнең заманча әдәбиятны да өйрәнүгә чакырабыз ", - диде Рыбакова.
"Тоталь диктант" – ул үзенең белемлелегеңне тикшерү генә түгел, үзенең йомшак якларыңны да белү өчен бик яхшы мөмкинлек, дип ассызыклады банк хезмәткәре Галина Никишина. Чарада ул инде икенче ел катнаша. "Һәрвакыт үзең өчен берәр нәрсә белән шөгыльләнәсең һәм камилләшергә телисең. Ә монда үзеңнең йомшак якларыңа карыйсың һәм барысын да төзәтергә мөмкин икәнен күрәсең. Узган юлы мин башка мәйданчыкка бардым. Ә быел монда килдем, чөнки монда диктантны Илья Александрович Славутский укый ", - диде Никишина.
Бухгалтер Юлия чарага үзенең ун яшьлек улы Егор белән килде. Аның фикеренчә, диктант – балаларга грамоталыкка мәхәббәт тәрбияләү өчен менә дигән мөмкинлек. "Мин диктантта беренче тапкыр катнашам. Мин монда үз улымны алып килдем, хәтта өлкәннәрнең дә белеле булырга теләүләрен күрсәтү һәм аларның ни дәрәҗәдә кагыйдәләрне хәтерләвен тикшерү өчен. Мин үз көчемне сынап карарга телим. Мин диктантка әзерләнмәдем. Минем ни дәрәҗәдә грамоталы итеп яза алуымны әзерлексез тикшерергә телим ", - диде Юлия.
Китапханәче Зөлфия Кәримова “Тоталь диктант”ка үзе генә килде. Ул чарада инде җиде ел катнаша. Кыз үз белемнәрен тикшерергә теләгән фикердәшләрен таба алмады, әмма аның өчен акция инде яхшы традициягә әйләнде.
"Миңа һәрвакыт үземнең грамоталыгымны тикшерү кызык булды. Моңа кадәр диктантны мин һәрвакыт дүртлегә яздым. Дөрес, бер тапкыр барыбер өчлелек кенә булды. Мин диктантка беркайчан да әзерләнмим. Глуховский текстын мин укымадым, бу минем автор белән беренче танышуым булачак ", - диде Кәримова.
"Тоталь диктант-2021" 10 апрельдә Мәскәү вакыты белән 14.00 сәгатьтә башланды. Акция Татарстанның барлык районнарында узды. Мәсәлән, Әлмәт нефть институтында диктант укучы ролендә шәһәр һәм район башлыгы Тимур Нагуманов чыгыш ясады. Быел республикада “Тоталь диктант” язу өчен 630 мәйданчык оештырылган, шуларның 230ы Татарстан башкаласында урнашкан. Акциягә кушылырга һәм үз грамоталыгыңны шулай ук дөньяның теләсә кайсы ноктасыннан онлайн-диктант язып та тикшерергә мөмкин иде.