ТР мәгариф һәм фән министрлыгы көллиятләр җитәкчеләренә сайтларны алып баруга кагылышлы таләпләр турында искәртте
Урта белем бирү учреждениеләрен кабул итүнең контроль цифрларын үтәү мониторингы нәтиҗәсендә аларның җитәкчеләренең мәгълүматны үз сайтларында актуальләштермәүләре ачыкланды. Бу хакта Татарстан мәгариф һәм фән министры урынбасары Рәмис Мөҗипов сөйләде.
"Соңгы вакытта иң таралган очракларның берсе булып урта һөнәри белем бирү учреждениеләрендә "үле җаннар" дип аталган вәзгыять тора. Бу законны бозу гына түгел, бу җитәкчеләрнең ваемсыз, җинаятьчел мөнәсәбәте. Моңа бернинди акланулар булырга мөмкин түгел. Асылда укымаган, диплом алырга гына килгән студентлар эш бирүчеләргә кирәкми. Һәм моңа бик җитди карарга кирәк, мәгарифкә бик зур бюджет акчалары кертелә бит ", - диде агентлык әңгәмәдәше.
Аның сүзләренә караганда, мондый җитәкчеләр шунда ук вазыйфаларыннан азат ителә.
«Шуңа бәйле рәвештә Татарстан Республикасы Президенты барлык урта белем бирү учреждениеләрендә мониторинг үткәрүне йөкләде. Июль ахырына кадәр бу тикшерү үткәрелергә тиеш, бүгенге көнгә 13 учреждение тикшерелгән, шул исәптән кабул итүнең контроль саннарын үтәү буенча да, - дип өстәде Мөҗипов.
Министр урынбасары билгеләгәнчә, тикшерү вакытында яңартылмый һәм актуальләштерелми торган сайтларны алып бару буенча кимчелекләр ачыкланган.
"Без моны эшләргә кирәк дип саныйбыз, чөнки уку учреждениесенең кыйммәте халык өчен мәгълүматның ачыклыгы һәм һәркем файдалана алырлык булуы буенча бәяләнә. Федераль хакимият органнары бу мәгълүматны көллиятләрдән турыдан-туры төбәк министрлыгы аша сорамыйлар, ә алар учреждение сайтына керәләр һәм сайттан аның турында бөтен релевант мәгълүматны алалар. Сайтны алып бару тәртибен бозган өчен вазыйфаи затлар өчен 10 меңнән 30 мең сумга кадәр штраф каралган ", - дип йомгаклады Рәмис Мөҗипов.