Татарстан Республикасы Мамадыш районы башлыгы академик Вәлиев исемендәге лицейда шахмат зонасы ачты
Мамадышта академик К.Вәлиев исемендәге 2 нче лицей базасында шахмат зонасы ачылды. Уку йорты шахмат уйнау өчен өч комплект белән тулыланды.
Шахмат белән шөгыльләнү өчен чираттагы мәйданчык Мамадыш районы башлыгы Анатолий Иванов, ТР Дәүләт Советы депутаты Марат Галиев һәм ТР шахмат федерациясе вәкилләре Илдар Низамов катнашында ачылды. Кунаклар яшь шахматчыларга уңышлар теләделәр.
Лицейда җиде ел дәвамында шахмат түгәрәге эшли. Ике төркемдә 25әр бала шөгыльләнә. Укучылар төрле дәрәҗәдәге конкурсларда актив катнашалар һәм призлы урыннар алалар. Лицей укучыларының тренеры Айрат Сафин.
"Уеннардагы партияләр сезгә тормышта да киртәләрне җиңәргә ярдәм итә. Шахматта оттыру куркыныч түгел. Иң мөһиме – ул реаль тормышта җиңүче булып калырга ярдәм итәчәк тәҗрибә алу", - дип билгеләп үтте Марат Галиев.
Рәсми өлештән соң Илдар Низамов лицей укучылары өчен шахмат уены буенча мастер-класс оештырды.
Татарстанда шахмат зоналары «Бердәм Россия» партиясе инициативасы буенча ачыла. Быел Татарстанда барлыгы шундый 986 мәйданчык ачу планлаштырыла.