Рөстәм Миңнеханов татар теле буенча VIII Халыкара олимпиада җиңүчеләрен бүләкләде
Татарстан Президенты Рөстәм Миңнеханов татар теле буенча VIII Халыкара олимпиадада җиңүчеләргә бүләкләр тапшырды. Бүләкләү тантанасында шулай ук ТР вице-премьеры, Бөтендөнья татар конгрессы «Милли Шура» милли советы рәисе Васил Шәйхрәзиев катнашты.
Рөстәм Миңнеханов ассызыклаганча, Татарстанда туган телләрне саклауга аерым игътибар бирелә.
"Шундый актив яшь егет-кызлардан башка бу мөһим эштә уңышларга ирешеп булмый", - дип мактады очрашуда катнашучыларны Татарстан Президенты. Ул билгеләп үткәнчә, Татарстан, башка төбәкләр һәм хәтта башка илләр яшьләренең туган телгә битараф булмавы мөһим.
Аннары Рөстәм Миңнеханов олимпиадада Гран-при номинациясендә җиңүчеләрне бүләкләде. Тантана ТР мәгариф һәм фән министрлыгы тарафыннан үткәрелә торган Бөтенроссия туган телләр форумы кысаларында узды.