Ватан сакчысын тәрбияләү: Татарстанда хәрби училищеларга курсантлар җыю бара
Татарстан мәктәпләрен тәмамлаучыларның күбесе, шул исәптән кызлар, хәрби вузларга керергә планлаштыралар. Анда барысы да эләгә алмаячак. Тормышны армия белән бәйләргә теләүчеләрдән, аларның ата-аналарыннан хәрби училищега сайлауга кагылышлы сораулар еш килә. "Татар-информ" ның бу һәм башка сорауларына Татарстан Республикасы хәрби комиссары, генерал-майор Сергей Погодин җавап бирде.
- Сергей Николаевич, хәрби уку йорты нинди һөнәри белем бирә?
- «Һөнәри белем бирүче хәрби уку йортларының урта һөнәри һәм югары дәрәҗәдәге гражданлык уку йортлары белән чагыштырганда зур аермалары юк. Югары белем бирү программасы буенча белгечләр әзерләүче хәрби уку йортлары училищелар, институтлар, университетлар һәм академияләр дип аталырга мөмкин.
Мондый уку йортларыннан чыкканда, курсантлар теге яки бу белгечлек алалар һәм лейтенант хәрби званиесендәге офицерлар булалар. Хәрби уку йортларында шулай ук урта һөнәри белем бирү программалары буенча әзерлек алып барыла. Бу урта звено, техника белгечләре. Укып бетергәч, мондый курсантлар урта һөнәри белем бирү турында диплом һәм прапорщик хәрби званиесе алалар. Мондый белгечләрне шул ук һөнәри белем бирү уку йортларының аерым факультетларында да әзерлиләр.»
- Хәрби училищеда нәрсәгә өйрәтәләр?
- «Беренчедән, хәрби һөнәрләргә. Ватаныбызны саклаучы, очучы да, диңгезче дә, пехотачы да, артиллерист та, танкист та, хәрби юрист та, элемтәче дә булачак. Кагыйдә буларак, курсант икенче курста уку вакытына һәм уку тәмамланганнан соң биш елга РФ Оборона министрлыгы белән контракт төзи. Бу мәҗбүри. Уку тәмамланганнан соң бүленеш була, ягъни мөстәкыйль рәвештә хезмәт урынын эзләү таләп ителми. Икенчедән, Ватанны саклаучының характеры формалаша һәм һәр хәрби хезмәткәргә хас күнекмәләр һәм осталык үзләштерелә: үзконтроль һәм тәртип, дисциплина, инициатива, дәрәҗә буенча өлкәнгә буйсыну, хезмәт сөю, кыюлык, физик һәм спорт күнекмәләре үсә.»
- Конкурс сайлавы ничек уза?
- «РФ оборона министры Сергей Шойгу, Covid-19 инфекциясен кертүне һәм таратуны булдырмау максатыннан, 2020-2022 елларда Россия Оборона министрлыгы югары уку йортларына беренче курсларга керү өчен кандидатлар сайлап алуны яшәгән җирләрендә үткәрү карарын кабул итте. Моның өчен мәгариф оешмалары башлыклары урынбасарлары яки кафедра начальниклары җитәкчелегендә югары уку йортларыннан күчмә төркемнәре оештырылды. Мондый төркемнәр составына һөнәри психологик сайлап алу, физик әзерлек белгечләре, шулай ук башка белгечләр кергән. Кагыйдә буларак, июнь ахырыннан июль ахырына кадәр алар Россия субъектларында эшләделәр.
Быел хәрби вузларга сайлау ничек узачак, без өстәмә рәвештә 2023 елның апрелендә хәбәр итәчәкбез.»
- Хәрби училищеларга керү турында тагын да җентеклерәк мәгълүмат табарга мөмкинме?
«Татарстан Республикасы интернет-порталының vk.tatarstan.ru рәсми сайтында «Хәрби училищелар» бүлегендә таләп ителә торган мәгълүмат урнаштырылган. Мәгълүматны РФ МО югары уку йортларының рәсми сайтларында яки РФ mil.ru рәсми порталында алырга мөмкин.
Кызыксындырган сорауны мөрәҗәгатьләр, электрон кабул итү яки сайт аша түгел, ә турыдан-туры бирү мөмкинлеге бармы? Туры телефон линиясе эше оештырылырмы?
Татарстан Республикасы интернет-порталында “Татарстан Республикасы хәрби комиссариаты” бүлегендә (vk.tatarstan.ru) 2023 елның 1 апреленнән 15 июленә кадәр “Кайнар линия” эшләячәк. Анда кайнар линия телефоннары күрсәтеләчәк, шул исәптән муниципаль районнарда хәрби комиссариатларның телефоннары да. Сәгать 10 нан 12.00гә кадәр (Мәскәү вакыты) шалтыратулар кабул ителә. Шулай ук күрсәтелгән сайтта гражданнар тарафыннан электрон рәвештә мөрәҗәгатьләр бирергә мөмкин.»