Яр Чаллыда 57 нче гимназия ачылуга әзер
Барлык эшләр төгәлләнгән, сыйныфларда һәм лабораторияләрдә җиһазлар урнаштыру эшләре бара. Мәктәп территориясенең мәйданы - 3 гектарга якын, мәктәп өч катлы, бассейн, бина янындагы территориядә спорт кыры бар.
Мәктәп территориясендә инде КПП урнаштырылган, бу елның яңалыгы- үткәрү системасында Face ID кертү булды, ул укучыларның йөзен таный.
Гимназия директоры Елена Федоренко мәктәптә меңгә якын укучы укыячак диде. Укучыларны кабул итү әле дәвам итә. Ә педагогик состав инде тулысынча тупланган.
Хәзерге вакытта мәктәпнең тышкы ягында төзелеш эшләре бара - Мәскәү проспектының беренче этабы тәмамлана. Тукталыш мәктәп янында ук урнашачак, тротуарлар инде салынган. Техник эшләр тәмамланганнан соң, төзелеш компаниясе, мәктәпнең юл кырыйларын яшелләндерүне төгәлләргә планлаштыра.