Бөгелмә сәламәтләндерү үзәге - «Иң яхшы инклюзив мәктәп» Бөтенроссия конкурсы финалында
23 октябрьдә Мәскәү дәүләт психология-педагогика университетында «Иң яхшы инклюзив мәктәп - 2023» X Бөтенроссия конкурсының финал этабын ачу тантанасы узачак. Конкурсны оештыручы - Россия Мәгариф министрлыгы. Конкурс белем бирү оешмаларының инклюзив гомуми һәм һөнәри белем бирүне үстерүдә һәм гамәлгә кертүдә активлыгын арттыру, шулай ук балаларның инклюзив ялын һәм аларны савыктыру максатларында уздырыла.
Педагог һәм остаз елында конкурсның читтән торып федераль этабында Россия Федерациясенең 67 субъектыннан 174 белем бирү оешмасы - төбәк конкурсларында җиңүчеләр катнашты.
23 һәм 24 октябрьдә узачак конкурс сынаулары нәтиҗәләре буенча жюри дүрт номинациядә җиңүчеләрне билгеләячәк:
«Иң яхшы инклюзив балалар бакчасы»,
«Иң яхшы инклюзив мәктәп»,
«Балаларның ялын һәм аларны савыктыруны иң яхшы инклюзив оештыру»,
"Иң яхшы инклюзив һөнәри белем бирү оешмасы".
«Балаларның ялын һәм аларны сәламәтләндерүне иң яхшы инклюзив оештыру - 2023» номинациясе финалистлары исемлегенә Бөгелмә муниципаль районыннан А.Д. Губин исемендәге Яшьләр сәламәтләндерү үзәге керде. Үзәк Кече Бөгелмә авылының урман зонасында урнашкан һәм каникуллар вакытында балаларга ел әйләнәсе ял итү өчен билгеләнгән. Бу номинациядә тагын 19 учреждение тәкъдим ителде.
Җиңүчеләрне бүләкләү 25 октябрьдә 10:00 сәгатьтә (Мәскәү вакыты буенча) конкурсны ябу тантанасында «Россия Федерациясендә инклюзив белем бирү шартларын тәэмин итүнең актуаль мәсьәләләре» VII Халыкара фәнни-гамәли конференциясе кысаларында узачак.