ТР Мәгариф һәм фән министры Илсур Һадиуллин Түбән Каманың беренче югары уку йортын 60 еллык юбилее белән котлады
Түбән Кама химия-технология институты үзенең 60 еллыгын билгеләп үтте.
Халык иҗаты йорты фойесында күргәзмәдә НХТИ кафедрасы тарихы тәкъдим ителде. Кунакларны оркестр музыкасы белән каршы алдылар. Бәйрәмгә студентлар, чыгарылыш укучылары, хезмәткәрләр, институт ветераннары, мәктәп директорлары, шулай ук мәртәбәле кунаклар җыелды.
Институт тарихы Түбән Кама шәһәре белән тыгыз бәйләнгән. Түбән Кама химия-технология институты үзенең 60 еллык чорында төрле профильдәге 20 меңнән артык белгеч: технологлар, механиклар, автоматлаштыру, энергетика, суыткычлар буенча белгечләр әзерләде. Бәйрәм концертын НХТИ студентлары чыгышы ачты - театральләштерелгән тамашада алар институтка кергән һәм анда диплом алган беренче кешеләр турында сөйләделәр.
ТР фән һәм мәгариф министры Илсур Һадиуллин Түбән Камалыларны котлады: «Институт тарихы Түбән Кама тарихы белән тыгыз бәйләнгән. Бүген без сезнең хезмәтегезнең җимешләре, казанышларыгыз һәм җиңүләрегез белән горурлана алабыз. НХТИ тәмамлаучылар хәзер үз институтларын һәм шәһәрне илнең төрле нокталарында таныта, чөнки югары дәрәҗәдәге белгечләр бөтен җирдә кирәк. Россия президенты Владимир Путин тарафыннан игълан ителгән педагог һәм остаз елында әлеге институтны булдырган кешеләргә ихлас күңелдән рәхмәт әйтәсе килә. Уңышлар, иминлек һәм бәхет сезгә».