КФУ укучыларны төбәкара фән олимпиадаларына чакыра
Олимпиада ике этапта уздырыла. Сайлау этабы 1 ноябрьдән 1 декабрьгә кадәр дистанцион рәвештә (сайтта теркәлү) узачак. Гомуми белем бирү мәгариф оешмаларының 5-11 сыйныф укучылары Казан федераль университетының төбәкара фән олимпиадаларында катнашырга чакырыла.
Укучылар олимпиадасының Россия советы исемлегенә (РСОШ) 2023/2024 уку елына түбәндәге профильләр кертелгән: дизайн, химия (1 нче дәрәҗә), рус теле һәм физика (2 нче дәрәҗә), математика, чит тел (инглиз, француз, немец, испан, итальян), информатика һәм геология (3 нче дәрәҗә).
Сайлап алу этабында җиңүчеләр һәм призерлар йомгаклау этабында катнашуга чакырылачак.
Йомгаклау этабы 2024 елның гыйнварыннан февральгә кадәр КФУ партнерлары мәйданчыкларында яисә дистанцион рәвештә (прокторинг системасын кулланып) узачак.
Олимпиадаларда катнашу бушлай.