Нурлат шәһәренең 2 нче урта мәктәбендә футбол мәйданчыгын ясау эшенә керештеләр

Нурлат шәһәренең 2 нче урта мәктәбендә футбол мәйданчыгын ясау эшенә керештеләр. Мәйданчыкны урнаштыру белән “Лидер” җәмгыяте хезмәткәрләре шөгыльләнә.
Мәктәп директоры Рита Хисамова сөйләгәннәрдән аңлашылганча, мәйданчык булырга тиешле урын агач төпләреннән арындырылган инде. Моннан тыш, бирегә балчык китереләчәк. Аннан грунтны күтәрү эшләре башлана.
Ясалма үләннән ясалган футбол мәйданчыгын урнаштыру эшләрен төзүчеләр салкыннарга кадәр хәл итәргә планлаштыра. Район мәгариф идарәсе мәгълүматлары буенча, Республика Президенты инициативасы нигезендә әлеге футбол мәйданчыклары Универсиадага стадион төзү эшендә катнашкан районнарга бүлеп бирелгән. Нурлат районының баллары өч мәйданчыкка җиткән. Районга кайтарылган өч футбол мәйданчыгының тагын икесе шәһәрнең 8, 9 нчы урта мәктәпләрендә урнаштырылачак.