Чүпрәле училищесы техникумга әйләнде

Чүпрәле муниципаль районы үзәгендәге 90 нчы номерлы һөнәр училищесы “Чүпрәле тармак технологияләре техникумы” (“Дрожжановский техникум отраслевых технологий”) автономияле дәүләт урта һөнәри белем бирү учреждениесе статусына ия булды.
Техникум директоры Рамил Әхмәтов сөйләгәннәрдән аңлашылганча, техникумда программа нигезендә ике тармак буенча – башлангыч һөнәри белем (НПО) һәм урта һөнәри белем бирү(СПО) каралган. Урта һөнәри белем бирү программасы нигезендә 2014 елдан җәмәгать туклануы продукциясе юнәлеше буенча – техник-технолог, авыл хуҗалыгы механизациясе буенча – техник-механик, автомобиль транспортын ремонтлау һәм техник хезмәт күрсәтү буенча – техник, икътисад һәм бухгалтер учеты (тармаклар буенча) - бухгалтерлар белгечлекләренә укыту планлаштырыла.
Хәзерге вакытта техникумны юридик зат буларак теркәү, лицензия алу һәм устав кабул итү өстендә эш алып барыла. Бүгенге көндә башлангыч һөнәри белем бирү программасы буенча авыл, район өчен таләп ителгән тракторчы-машинист, автомеханик (яңа һөнәр), пешекче-кондитерлар, электр һәм газ белән эретеп ябыштыручы, умартачы, сатучы, цифрлы мәгълүматны эшкәртү мастеры һөнәрләренә өйрәнәләр. Шулай ук, 8нче группага кергән физик тайпылышлары булган укучылар өчен коррекцион уку төркеме оештырылган. Биредә алар төзелеш һәм бизәкләү эшләре буенча белгечлек үзләштерәчәк. Шоферларга, категорияләрен күтәрү өчен түләүле курслар да эшли.
Үткән елларда уку биналары, тулай торак бинасы төзекләндерелде, производство мастерскойлары реконструкцияләнде. Автотрактодром яңартылды, биредә юл йөрүтбилгеләре яңаларына алмаштырылды. 2014 елга бер уку корпусының эчен тулысынча төзекләндерү буенча дәүләт планына кертеп калдыра алдык, киләсе елга төзекләндерү эшләренә тотыначакбыз. Автотрактодром уку машиналары белән тулыландырылды. Хәзерге вакытта биредә булачак шоферларны машина йөртүгә әзерләү өчен 5 җиңел машина, 2 “КамАЗ” автомобиле, 2 автобус бар. Шулай ук, хәрби комиссариат белән килешү нигезендә, булачак солдатларны ВУС-827 программасы нигезендә укытып, С категорияле шофер белгечлеге буенча әзерләү өчен бер “Урал” автомобиле дә бар. Армия өчен елына 30-35ләп шофер әзерлибез, ди әлеге уку йорты директоры. Аннан соң безнең үзебезнең 305 гектар мәйданны биләгән чәчүлек җирләребез бар, анда төрле культуралар игәбез. Сүз уңаеннан, быелгы урак чорында бөртеклеләрнең һәр гектарыннан уртача 20,3әр центнер уңыш чыкты. Җирләребезне эшкәртү өчен җитәрлек күләмдә техникабыз бар. Биредә шуны да ассызыклыйсым килә, җирләребезне чәчү һәм уңышын җыеп алу чорында белгечләребез – укытучы-мастерлар һәм студентлар эшлиләр. Студентларга биредә эшләү чорында хезмәт хакы да түләнә, үзләрен сынап карау өчен менә дигән практика да. Шулай ук, техникум базасындагы уку хуҗалыгында терлекләр: сарыклар, дуңгызлар, куяннар, атлар асрыйбыз. 30 оя умарта кортлары бар. Умартачы һөнәрен үзләштерүчеләр практиканы шунда үтәләр, ди ул.
Башка авыллардан яисә чит төбәкләрдән килүче укучылар өчен 90 урынга исәпләнгән тулай торак. Тулай торакта урын җитмәгән очракта студентларга район үзәгендә фатирлар табарга ярдәм итәләр, урнаштыралар, фатир өчен түләүнең бер өлешен техникум үз өстенә ала. Студентларны ашханәдә өч тапкыр түләүсез ашату оештырылган. Уку елы дәвамында алар стипендия белән тәэмин ителә.