Татарстанда бер елда 11 яңа мәктәп һәм 9 балалар бакчасы төзиячәкләр
“Авыл территорияләрен комплекслы үстерү” дәүләт программасының “Мәгариф”илкүләм проекты һәм “Авыл территорияләренең заманча йөзе” федераль проекты буенча “Яз” торак комплексында, М-14 микрорайонында һәм Казандагы Ватан урамында, Лаеш районының Усад авылында, Биектау һәм Питрәч Ковали авылларында, шулай ук Яр Чаллының 65 нче микрорайонында һәм Биектау районының Чернышевка авылында мәктәпләр төзеләчәк.
«Быел 1980 урынга исәпләнгән балалар бакчалары төзеләчәк. Алар бу объектларга ихтыяҗны исәпкә алып төзелә. Тукай һәм Лаеш районнарында, Казанда, Түбән Камада, Яр Чаллыда һәм башка шәһәрләрдә яңа микрорайоннар булдырыла", - диде Һадиуллин.
Яңа балалар бакчалары Казанда Бохара, Ягодинская һәм “Салават күпере” торак комплексында, Питрәч районының Көек авылының “Яшьлек” микрорайонында, Яшел Үзән районының Васильево бистәсендә, Питрәч районының “Царево” торак комплексында, Биектау районының Шигали авылында, Лаеш районының Кече Кабан авылында һәм Апаста төзеләчәк.
Моннан тыш, быел республикада 44 мәктәп бинасы һәм 20 мәктәпкәчә мәгариф оешмасы капиталь төзекләндереләчәк.
Министр сүзләренә караганда, ел саен төбәк бюджетыннан мәгариф учреждениеләрен ремонтлауга 2 млрд сум акча бүлеп бирелә, азык-төлек блокларын ремонтлауга һәм аларны җиһазлауга - 1 млрд сум, ресурс үзәкләрен төзүгә, тулай торакларны һәм урта һөнәри белем бирү учреждениеләрен ремонтлауга - тагын 1 млрд сум.
Федераль программа буенча Татарстанда 765,5 млн сумлык алты мәктәпкә капиталь ремонт ясалачак.