Арча балалар сәнгать мәктәбенә 50 ел

Арча балалар сәнгать мәктәбе быел 25 ноябрьдә ачылуына чирек гасыр узуны билгеләп үтәргә җыена. Бүгенге көндә мәктәптә меңнән артык бала, музыка, бию, театр, нәфис сәнгать, театрга әзерлек бүлекләрендә белем ала. Районның башка мәктәпләрендә 15 филиал эшли.
1993 елда мәктәптә агачтан кисеп эшләнмәләр ясау бүлеге ачыла. Шул уңайдан мәктәп быел ике түгәрәк датаны билгеләп үтәчәк. Педагог Нияз Миңнемуллин җитәкләгән әлеге бүлеккә балалар кызыксынып, яратып йөри. Республика гына түгел, Россия күләмендә уздырылган конкурсларда катнашып, зур уңышларга ирешәләр, алдынгы урыннар яулап кайталар. Балаларның тырыш хезмәт җимешләрен район халкы гына түгел, килгән кунаклар да бик яратып ала. Сувенирлар белән бергә көнкүрештә кулланырга да менә дигән әйберләре сыйфатлы, матур, өстәвенә бәясе дә чагыштырмача арзан.
“Беренче дәресләрдә балаларны эш кораллары белән таныштырабыз, чөнки пычаклар, өтергеләр үткен итеп кайрала, - ди Нияз Миңнемуллин укытучы. - Балаларның һәрберсенә аерым игътибар кирәк, һәр бала үзенчә сәләтле”. Агач чималына, ботаклар, тамырларга урманга балалар укытучы белән бергә бара, ә такталарга иганәчеләр ярдәм итә.