Телефон һәм хәрби әзерлек: Татарстанда 1 сентябрьдән укучыларны нәрсә көтә
Татарстан мәктәпләре яңа уку елы башлануга әзерләнәләр. Дәресләр расписаниесендә нинди яңа предметлар барлыкка киләчәк, ни өчен укучыларга мобиль телефоннар куллануны тыячаклар, балаларның куркынычсызлыгы ничек тәэмин ителәчәк һәм "Физик-математик алга китеш" проектыннан нәрсә көтәргә икәнлеге турында Мәгариф һәм фән министрлыгы башлыгы Илсур Һадиуллин онлайн-конференциядә сөйләде.
1 сентябрьдән укучылар уку процессында мобиль телефоннарны файдалана алмаячак, диде Татарстан мәгариф һәм фән министры Илсур Һадиуллин.
Бу федераль яңалык - бөтен Россия буенча шулай булачак.
Һадиуллин сүзләренә караганда, мобильниклар кайбер көллият һәм техникумнарда да тыела.
Хәрби белем бирү һәм җыеннар
Тагын бер яңалык - әлеге уку елыннан "Тормыш иминлеге нигезләре" предметы урынына мәктәп укучылары "Ватанны саклау һәм куркынычсызлык нигезләрен" өйрәнәчәк, дип хәбәр итте Мәгариф һәм фән министрлыгы башлыгы.
Аның сүзләренә караганда, сигезенче сыйныфтан соң бу предмет кысаларында укучылар беренче тапкыр өч көнлек, ә 10 сыйныфтан соң биш көнлек җыеннар узачак.
Ул "Ватанны саклау һәм куркынычсызлык нигезләре" укыту өчен республикада меңнән артык ОБЖ укытучысы укулар узды, дип өстәде.
«Хезмәт» («Технология») дәресләре 1 - 9 сыйныф укучыларының дәресләре расписаниесенә керәчәк, дип хәбәр итте министр.
Мәгариф һәм фән министрлыгы башлыгы хәбәр иткәнчә, ТР Рәисе Рөстәм Миңнеханов хезмәт кабинетларын җиһазлар белән тәэмин итү буенча биш еллык программаны эшләргә йөкләмә бирде.
Мәктәпләрдә 20 физика-математика сыйныфы ачылачак
Татарстанда төгәл фәннәрне популярлаштыру өчен «Физик-математик алгарыш» проектын эшләтеп җибәрәчәкләр. Һәм уку елы башыннан ук мәктәпләрдә 20 физика-математика сыйныфы ачылачак, диде министр.
Моннан тыш, проект кысаларында 1 сентябрьдән 5-7 сыйныф укучылары өчен йөз физика-математика түгәрәге ачылачак. Ә укыту өчен йөз укытучы һәр ай саен 10 мең сум өстәмә түләү алачак.
Шулай ук уку елы ахырында эш нәтиҗәләре буенча физика һәм математика укытучыларына 25 мең сум күләмендә грантлар бирү планлаштырыла.
Моннан тыш, балалар белән эшләүче, югары нәтиҗәләргә ирешкән математика, физика һәм химия буенча яшь укытучылар 20 мең сум алачак.
"Укытучылар кытлыгы белән мәсьәлә әлегә хәл ителмәгән"
Гомумән алганда, Татарстанда укытучылар җитмәү саклана. Шуның аркасында 35% педагог 1,5 ставкага эшли, дип белдерде мәгариф һәм фән министры.
"Беренче урында балалар иминлеге, шуңа күрә барысына да уяу булырга кирәк"
Мәктәпләрне саклауга Татарстан бюджетыннан 1,5 млрд сумга якын акча бүленгән. Һәм бу эш дәвам итәчәк, дип ассызыклады Һадиуллин.
Министр сүзләренә караганда, мәктәпләрне саклауны хосусый оешмалар тәэмин итә. Барлык мәктәп территорияләре коймалар белән тотып алынган, 75% учреждениеләргә видеокүзәтү урнаштырылган.
"Элек хәтта район үзәкләрендә дә мондый актлар заллары юк иде"
Татарстанда 1 сентябрьдә 10 мең укучыга исәпләнгән сигез яңа мәктәп һәм өч янкорма ачылачак. Моннан тыш, быел 2 мең урынлык ун балалар бакчасы төзеләчәк, дип хәбәр итте министр.
Моннан тыш, 1 сентябрьгә 49 мәктәпне капиталь ремонтлау һәм 94 азык-төлек блогын ремонтлау төгәлләнәчәк. «Федераль программа буенча Казанда алты мәктәп ремонтлана. Алар да уку елы башына әзер булачак. Әйе, ремонт таләп итә торган мәктәпләр дә бар әле, әмма без алар турында онытмыйбыз», - дип ассызыклады министр.
Ел саен мәктәпләрне һәм балалар бакчаларын ремонтлауга республика бюджетыннан 2,5 млрд сумнан артык акча бүлеп бирелә. Ел саен шулай ук мәктәп азык-төлек локларын ремонтлауга һәм аларны яңа җиһазлар белән тәэмин итүгә 1 млрд сум җибәрелә.
Гомумән, аның сүзләренчә, Татарстан мәктәпләре яңа уку елы башлануга әзер.