Белемдә генә түгел хикмәт...

28 сентябрь көнне башкалабызда Татарстан мәгариф хезмәткәрләренең I Җәйге спартакиадасының финал өлеше узды. Ярышларда меңнән артык педагог катнашты.
Спартакиада үз эченә 100 метр арага йөгерү, биеклеккә һәм озынлыкка си­керү, йөзү, бадминтон, кул көрәше, гер күтәрү, бау тарту кебек ярышларны үз эченә алган. Чара Үзәк стадионда үтте. Казан мәгариф бүлеге идарәсе башлыгы Илсур Һадиуллин әйтүенчә, безнең укытучылар тагын бер кат үзләренең сәләт­ләрен күрсәтте. Алар балаларны тәрбия­ләү һәм белем бирү белән беррәттән чараларда үзләренең сәламәтлеген дә ныгыта, беренчелекне алырга омтыла. “Спартакиада безнең коллективны уятып җибәрде. Үзебез турында әйт­сәк, олы яшьтә булсак та, нәтиҗә­ләр­дән канәгатьбез”, – ди Балык Бистәсе районы укытучысы Рушат абый Хәйруллин.
Әлки районыннан килгән Гөлназ Шәрипова, Лилия Садыйкованың күңел­ләре шат. “Башта муниципаль районнар­ның җыел­ма командалары арасында ярыш булды, аннан безне бер гомуми командага җый­дылар. Спартакиада укытучыларны бар яктан берләштерә”, – ди алар.
Һәр спорт төре буенча аерым, шулай ук командалар арасында 1, 2 һәм 3нче урыннар билгеләнде. Беренче урынны Арча укытучылары яулады. Җиңүчеләргә Кубок, мактау кәгазь­ләре, кыйммәтле бүләкләр тапшырылды