Тел дигән дәрья бар

Кичә, 24 октябрь көнне, Мостафа Өнҗәл исемендәге лицей-интернатта /директоры – Латиф бәй Чинар/ шәһәр һәм районның татар теле һәм әдәбияты укытучылары семинар-практикумга җыелды. “Нәтиҗәле метод, алым һәм педагогик технологияләр кулланып, татар теленә өйрәтүнең сыйфатын күтәрү” дип исемләнгән иде ул. Семинар эшенә Бөгелмә муниципаль районы мәгариф идарәсенең милли бүлеге җитәкчесе Фәүзия Мәхмүтова җитәкчелек итте.
Лицей-интернатның татар теле һәм әдәбияты укытучылары Гөлсинә Кашапова, Рамилә Таилпова, Резеда Зәйнуллина татар һәм рус төркемнәрендә укучы 9 нчы сыйныф балалары өчен ачык дәресләр үткәрделәр. Белгәнебезчә, нәкъ менә 9 нчы сыйныфны тәмамлаганда укучылар татар теленнән Дәүләт йомгаклау аттестациясе /ГИА/ үтәләр, ягъни имтихан тапшыралар. Ачык дәресләрдә әлеге сыйныф укучыла-
рының шушы имтиханнарга ничек әзерләнүен, остазларының нинди алымнар кулланып эшләвен күрергә мөмкин булды.
Гомумән алганда, лицей-интернат үзенең педагоглар коллективы алдына, тупланган тәҗрибәгә таянып һәм заманча технологияләрне файдаланып, дәүләт йомгак-
лау аттестациясе вакытында югары күрсәткечләргә ирешүгә һәм шәхес формалаштыруга иҗади мохит булдыру бурычын куя. Шул уңайдан алдынгы укыту методикаларын куллану, алар аша укучыларда предметка кызыксыну уяту да алга куелган лицейда. Һәм әлеге бурычларны тормышка ашыру юлында киртәләр булмас дип ышанып әйтергә була, чөнки лицей-интернатның җиһазлану, укытучыларның квалификация дәрәҗәсе һәм аларның үз укучыларына дөрес итеп шуларны җиткерә алулары – моңа төпле мисал.
Ачык дәрестән соң лицей-интернатның актлар залында “Туган телем – иркә гөлем”
дип исемләнгән класстан тыш чара үтте. Анда төрле сыйныф укучылары теләп чыгыш ясадылар (рәсемдә), шуның белән лицейда тәрбия эшенең дә дөрес юнәлештә алып барылуын дәлилләделәр. Аннан соң татар теле һәм әдәбияты укытучылары күргәннәре турында фикер алыштылар, тәҗрибә уртаклаштылар. Семинар эшенең төп нәтиҗәсе булып, лицейдагы барлык балаларда да татар телен өйрәнүгә кызыксынуның артуы, остазларының исә шушы максаттан укучыларына дөрес юнәлеш, белем бирүләрен ачыклау торды.
Автор фотосы