Чаллы политехника көллиятендә һөнәри осталык конкурсы узды
Яр Чаллы политехника көллиятендә «Лучший контролер. Металлообработка» һөнәри осталык республика конкурсы үтте. Анда Казан, Алабуга, Түбән Кама һәм Лениногорск шәһәрләреннән тугыз уку йорты вәкилләре катнашты.
Конкурсантларга үз белемнәрен теориядә һәм практикада күрсәтергә кирәк иде. Алар гомумһөнәри дисциплиналар буенча тест биремнәрен чиштеләр, ә практик биремне үтәгәндә сызым укыганда күнекмәләр, үлчәү приборларын куллану, бракның сәбәпләрен билгеләү исәпкә алынды.
Беренче урынга ике катнашучы лаек булды: НПК икенче курс студенты Данил Кобяков һәм Түбән Кама индустриаль техникумының дүртенче курс студенты Алмаз Әхмәтшин. Икенче урынны Илдар Фомин (В.Д. Поташов исемендәге техник көллият), өченче урынны - Ренас Хөснуллин (Казан технология көллияте) алды.