Пәрәвез сыман эләктерде

Саба районының И.С.Баш­киров исемендәге Завод-Нырты мәктәбе укучылары бадминтон белән һич уйламаганда шөгыльләнә башлый. 2009 елда Спартакиадага команда тупларга кирәк була. Бүген әлеге спорт төре уку­чыларның иң яратканы дисәң дә була. “Ул чакта бадминтон­ның ни икәнлеген дә аңлап бетерми идек әле”, – дип искә ала физик тәрбия бирү укытучысы Гөлнара Зарипова. “Ярышлар алдыннан бары бер ай гына уйнадык. Ул чакта бадминтон белән берничә район гына шөгыльләнә иде, күп кенә уенчылар беренче тапкыр чыгыш ясады. 2010 елда уздырылган Яшьләр Спартакиадасында команда 1 нче урынны ала.
Иң күп уңышлы урыннар исә быел июль аенда Казанда яулана. Татарстан чемпионатыннан Саба районы җыелма командасы 32 медаль белән кайта. “Без хәтта казаннарның да борыннарына чиерттек!” – дип елмая яшь бадминтончылар. “Бадминтон безне пәрә­вез сыман үзенә эләктереп алды. Уен өчен кирәкле булган барлык җиһазлар булу – зур бә­хет, мондый чакта фә­кать үз эшебез белән шөгыль­ләнәбез һәм моннан ләззәт алабыз”, – диләр спортчылар. Уңайлы шартлар тудырулары өчен укучылар, аларның әти-әни­ләре һәм тренерлары район администрациясенә бик рәх­мәтле.
2012 елдан һәр каникул саен бадминтон буенча җы­еннар үткәрелә. Уңышларның сере дә шунда. Әлеге җыен­нарда укучылар Мәскәүдән килгән тренер Ольга Козлова белән шөгыльләнәләр. “Балалар белән эшли генә башлаган чорда уртак тел табу бик кыен булды, алар оялдылар, аралашырга кыенсындылар. Ләкин тора-бара ике арада булган киртә юкка чыкты. Спортта бер өйрәнгәнне оныту бик авыр. Балаларга ракетканы дөрес тотарга өйрәтү иң кыены булгандыр. Ләкин шул кыенлыклар безгә якынаерга ярдәм итте. Укучылар белән җылы мөнәсәбәтләр булдыруымда аларның беренче тренерлары Гөлнара Хәми­товнаның да өлеше зур. Ул минем ярдәмчем дә, тәрҗемә­чем дә”, – ди тренер.
Бүген Саба районының яшь бадминтончылары декабрь аенда узачак Татарстан Кубогы ярышларына әзер­ләнә. Ольга Козлова укучы­ларның спорт белән профессиональ дәрәҗәдә шөгыльлә­нер өчен дә әзер булуларын яшерми. “Саба районында спортка караш бик югары, барлык мөмкинлекләр дә тудырылган”, – ди ул.
Хәзер Саба районыннан биш укучы Татар­станның юниорлар командасы составында Россия ярышларына йөри. Алар инде Саратов, Чиләбе шәһәрләрендә булырга өлгерде. Октябрьдә Пермь, ноябрьдә Түбән Новгород, декабрьдә Уфа якларында узачак ярышларда катнашулары көтелә.
2009 елның 26 сентябрен­дә малайзияле бадминтончы Тан Бун Хан Yonex Arcsaber Z-slash ракеткасын кулланып, дөнья рекорды куюга ирешә: аның валаны сәгатенә 421 чак­рым тизлек белән оча! Саба районы бадминтончылары да киләчәктә рекордлар куймас дип кем әйтә?!