Туган телләр буенча олимпиадаларның республика этабы тәмамланды
Татарстан районнарыннан килгән йөздән артык 9-11 сыйныф укучылары “Дуслык” комплексы базасында чуваш, удмурт, мари һәм мордва телләре буенча көч сынаштылар.
Нәтиҗәләрдән тыш, алар укытучылар белән бергә өстәмә чараларда һәм тематик семинарларда алынган яңа белем һәм күнекмәләр өйрәнеп кайтып киттеләр.
"Безнең мәктәптә мари теле туган тел буларак өйрәнелә", - диләр Кукмара районыннан килгән катнашучылар. Йомгаклау этабы алдыннан алар мәктәп һәм район дәрәҗәсендә уңышлы чыгыш ясаганнар, киләчәктә Марий Элда үз көчләрен сынап карарга өметләнәләр. Бүген команда мари һәм удмурт телләре буенча олимпиадаларда җиңүчеләр һәм призёрлар белән тулыланды.
Олимпиаданың республика этабы кысаларында укучылар һәм аларның җитәкчеләре өчен төрле тематик очрашулар да узды. Мәсәлән, удмурт телен һәм әдәбиятын өйрәнүчеләр «Зёчбур» балалар газетасына багышланган креатив хат остаханәсендә катнаштылар. Балалар басманың стиль үзенчәлекләрен өйрәнделәр һәм үз реклама текстларын әзерләделәр.
Чуваш теле һәм әдәбияты буенча Аксубай, Алексеевск, Әлки, Апас, Буа, Чүпрәле, Түбән Кама, Тәтеш, Чирмешән районнары, ә мари теле буенча Актаныш, Әгерҗе, Балтач, Кукмара, Мамадыш, Минзәлә районнары һәм Казан шәһәренең Совет районы укучылары җиңүче һәм призёр булдылар. Удмурт теле һәм әдәбияты буенча Әгерҗе, Балтач, Кукмара районнары укучылары яхшы нәтиҗәләр күрсәттеләр. Мордва теленнән җиңүчеләрне һәм призерларны Алексеевск, Бөгелмә һәм Тәтеш муниципаль берәмлекләре укытучылары әзерләгән.