Республика күләмендә үткәрелә торган III яшь биологлар турнирының җиңүчеләре билгеләнде

2013нче елның 27нче октябендә “Костер” исемле балалар сәламәтләндерү-белем бирү үзәгендә республика күләмендә ел саен үткәрелә торган III яшь биологлар турниры тәмамланды.
Турнирда Әлмәт, Болгар, Казан, Мамадыш, Түбән Кама, Яр Чаллы шәһәрләреннән һәм Татарстан Республикасы Бөгелмә, Теләче муниципаль районнарыннан 80 укучы һәм 18 команда җитәкчесе катнашты.
“Синьоры” лигасының команда беренчелегендә абсолют җиңүче булып “Dicentra” җыелма төркеме (Казан шәһәре “Сәләтле балаларны иҗади үстерү һәм гуманитар белем бирү үзәге” балаларга өстәмә белем бирү муниципаль бюджет учреждениесе вәкиле) танылды. Команда әгъзалары – Казан шәһәре 103нче мәктәпнең 11нче сыйныф укучысы Гыйлемханова Сабина, 18нче мәктәп 11нче сыйныф укучысы Закиров Әмир, 83нче лицей 10нчы сыйныф укучысы Индейкин Федор.
“Юниоры” лигасында җиңүче – “Эрудит” командасы. Ул Әлмәт шәһәре 7нче мәктәп укучыларыннан гыйбарәт: Крайнов Вадим (11нче сыйныф), Зарипова Диләрә (11нче сыйныф), Хәсәншина Гөлнара (10нчы сыйныф), Солтанова Регина (10нчы сыйныф).
Шәхси беренчелектә I дәрәҗәдәге дипломга Казан шәһәре 2нче лицей-интернат 10нчы сыйныф укучысы Сабиров Искәндәр (“Синьоры” лигасы), Бөгелмә муниципаль районы 6нчы мәктәп 11нче сыйныф укучысы Владимиров Андрей (“Юниоры” лигасы) лаек булдылар.
Жюри әгъзалары булган Казан федераль университетының укытучылары, Татарстан Республикасы Экология һәм табигый байлыклар министрлыгының экологик агарту һәм җәмәгать оешмалары белән үзара хезмәттәшлек бүлеге җитәкчесе Д.Ф. Вәлиуллин һәм турнирның жюри рәисе Д.В. Пупов җиңүчеләргә дипломнар һәм истәлекле бүләкләр тапшырдылар.
Казан шәһәре “Сәләтле балаларны иҗади үстерү һәм гуманитар белем бирү үзәге” җыелма командасы “Dicentra”, 2нче лицей-интернат төркеме “Promoter” һәм 4нче гимназия-интернат “ХХ” командасына Бөтенроссия яшь биологлар турнирында Татарстан Республикасы вәкилләре булырга мөмкинлек бирелде. Әлеге турнир Казан шәһәре Мәскәү районының “2 нче лицей-интернат” муниципаль автономияле гомуми белем учреждениесе бинасында 2013нче елның 5нче ноябрьдән 9нчы ноябрьгә кадәр уздырылачак.