Татарстан балалары Мәскәүдә яшьләр прогрммасы кысаларында узган “Ачык инновацияләр” халыкара инновацион үсеш форумының “InnoKids-2013” мәктәп блогында катнаштылар

30 октябрьдән 3 ноябрьгә кадәр 11 яшьтән 14 яшькә кадәр булган фәнни-техник иҗат белән кызыксынучы Татарстанның 10 яшь уйлап табучысы (Казан шәһәре Идел буе районының 19нчы гимназиясе һәм КФУның IT-лицее) Мәскәүдә яшьләр программасы кысаларында узган “Ачык инновацияләр” халыкара инноваөион үсеш форумының “InnoKids-2013” мәктәп блогында катнаштылар.
“InnoKids” мәктәп блогының төп темасы – “Киләчәк архитекторлары дөньяны үзгәртә”. Чаралар программасы шактый тулыландырылган иде. Балалар “Киләчәк архитектурасы” темасына лекция тыңладылар һәм әйдәп баручы белгечләр, архитектура һәм дизайн студияләре җитәкчелегендә “Без киләчәк шәһәре төзибез” дигән темага мастер-класс уздырдылар. “InnoKids” стендында күрсәтелгән киләчәк шәһәре макетлары бу мастер-классның нәтиҗәсе булып торды.
Форумда катнашучылар “Ачык инновацияләр” форумында күрсәтелгән Россиянең төрле регионнарыннан һәм башка илләрдән килгән инновацион эшкәртмәләр белән таныштылар.
Удальцев урамындагы 6нчы йортта урнашкан ЦМИТ Академиясендә балаларны робот техникасы һәм 3D-принтер, лазер станогы һәм архитектура осталыгы буенча мастер-класслар көтте. Балалар үз куллары белән кәгазьдән күперләр төзеделәр, робот-футболчылар җыйдылар һәм роботлар арасында футбол чемпионаты үткәрделәр, ә лазер станокларында үзләренә истәлеккә брелок-сувенирлар ясадылар.
Укудан тыш мәдәният программасы да читтә калмады. Балалар Дәүләт Дарвин музееның “Эволюция юлын үт!” экспозициясен карадылар, М.В. Ломоносов исемендәге МДЦда урнашкан җир белеме музеена, Кызыл Мәйданга, Воробьев тавына һәм Арбатка бардылар.Шунысын да билгеләп үтәргә кирәк: туклану, торак белән тәэмин итү дә бик югары дәрәҗәдә иде.
Балалар бик кәнәгать калдылар. Россиянең Инновацияләр Регионнары Ассоциациясенә, Татарстанга бу мөмкинлек өчен зур рәхмәтебезне белдерәбез.