Әлмәттә һәм Чаллыда «Физмат прорыв» фестивалендә 60 мәктәптән 1300 укучы катнашты
5-11 сыйныф укучылары интерактив практикумнарда, ихтимал теориясе, оптимизация, самолётның очуы, магнит резонансы турында лекцияләрдә, ә педагоглар - методик семинарларда булдылар һәм “Математикага гашыйк” документаль фильмын карадылар. Спикерлар булып Россия галимнәре, профессорлар һәм тикшеренүчеләр чыгыш ясады. Чыгыш язмалары проект сайтында бастырылган.
КФУның Физика институты директоры Марат Гафуров “Магнит резонансы: бу нәрсә һәм аны нәрсә белән ашыйлар” дигән докладында фестиваль катнашучыларына атом-төш магнит резонансы эффекты: күренешне ачу тарихы һәм аның асылы турында сөйләде. Докладның икенче яртысын галим төрле структураларда, шул исәптән тере организм тукымаларында дефектлар эзләү өчен кулланыла торган магнит-резонанс томографиясенә багышлаган.
Лекцияләрне карау өчен: fmp.innopolis.university/lectures
“Физмат прорыв” фестивален оештыручылар - ТР Мәгариф һәм фән министрлыгы, Иннополис университеты, Югары нефть мәктәбе һәм Чаллы дәүләт педагогика университеты.