Яшь биологларның Бөтенроссия турнирында Казаннан ике команда призер булды

2013 елның 5-9 ноябрендә Казан шәһәренең 2нче лицей-интернатында яшь биологларның VII Бөтенроссия турниры булып узды. Турнир – ул укучыларның мавыктыргыч танып белү ярышлары. Укучылар Турнирда биологиядән фундаменталь белемнәрен, фәнни проблемаларны чишә белүләрен, логик фикерләүләрен, анализлау мөмкинлекләрен, башка укучылар һәм компетентлы жюри алдында үз фикерләренең дөреслеген моназара формасында дәлилли алуларын күрсәттеләр. Ярышларның төп формасы – биологик көрәш. Турнирның биремнәре ачык типта, ягъни алар бертөсле генә җавапка ия түгел, аларны чишү өчен, төрле ысуллар куллану күздә тотыла.
Турнирның оештыручылары – Татарстан Республикасының мәгариф һәм фән министрлыгы, Казан шәһәренең 2 нче лицей-интернаты, Киров шәһәренең “Сәләтле укучыларга өстәмә белем бирү үзәге”. Турнирда Казан, Новсибирск, Ростов-на-Дону, Екатеринбург, Качканар, Киров, Төмән, Түбән Тагил шәһәрләре командалары катнашты.
Өч көн буенча чирекфинал көрәшендә 15 бирем уйналды. Ярымфиналга 4 команда узды: 2 команда Новосибирскидан, 2 команда Казаннан. Финал көрәшендә Новосибирск һәм Ростов-на-Дону шәһәрләре җыелма командасы "C. elegans" абсолют җиңүче исемен алды һәм 1 дәрәҗәдәге Дипломга лаек булды. Финалга чыккан өч команда "Дицентро Альба" (Казан шәһәре, җыелма команда), "Промотор" (2 нче лицей-интернат), "Потенциал действия" (Новосибирск шәһәре) 2 дәрәҗәдәге Диплом белән бүләкләнде.
Командалар сертификатлар, Татарстан Республикасының Мәгариф һәм фән Министрлыгы дипломнары, кыйммәтле призлар белән бүләкләнде. Ярышны оештыручылар турнирның партнеры һәм спонсоры Инновационные решения в образовании» фирмасына рәхмәтен белдерә. Турнирда катнашучыларның барысын да тәбриклибез!