Россия Мәгариф министрлыгы илдәге югары уку йортларының яңа рейтингын игълан итте

Быел һәр бишенче вузның эшчәнлеге сыйфатсыз дип табылган. “Кара исемлек”тә Татарстан вузлары да бар.

Тикшерү күрсәткәнчә, Россия вузларының – 18,4, филиал­лар­ның 20,4 процентының күрсәт­кечләре куандырмый. Узган ел илдә 30 университет һәм 260 филиал “фаш ителгән” иде. Быел беренче тапкыр дәүләтнеке булмаган уку йортларын да иләк аша уздырдылар. Аларның 35 процентында кимчелекләр ачыкланган. Ә дәү­ләти уку йортларында бу сан – 7,5 процент. Билгеле булганча, рейтинг белем бирү, фәнни-тик­ше­ренү, халыкара, фи­нанс-икъ­тисад эшчәнлеге, вуз­ның инфраструктурасы, мөгал­лимнәр арасында фән кандидатлары, доктор­ларының са­ны, яшь белгечләрнең эшкә урнашуы кебек күрсәт­кеч­ләр буенча төзелә. Соңгысына әле быел гына игътибар итә башладылар.

Дөрес, былтыр кайбер университет җитәкчеләре арасында эшчәнлекне бәяләү алымнары белән килешмәүчеләр дә булды. Быелгы исемлек берникадәр ка­милләшсә дә, белгечләр гомуми төркемдә барлык уку йортлары өчен дә бертөрле таләпләр куелудан канәгать түгел. Алар фике­ренчә, федераль һәм республика дәрәҗәсендәге югары уку йортына бер үк төрле коэффициентлар кую кирәкми. Аннан фәлән квад­рат мәйдан, фәлән кадәр чит ил студенты булырга тиеш, фәнни эшләр күләме дигән таләпләр дә чынбарлыкка туры килеп бетми. Саннарны тикшергәнче, күбрәк сыйфат мәсьәләсенә игътибар итсәләр, күпкә отышлы булыр иде.

 Узган ел Татарстанда 3 федераль вуз һәм 14 филиалның эш­чәнлеге нәтиҗәсез дип табылган иде. Быел исә бездәге уку йортларындагы җитешсезлекләр 20,5 процентны тәшкил итсә, Мәс­кәүдә ул – 23,7, Санкт-Петер­бург­та 30 процентка җитә. Татарстанда бар­лыгы 23 вуз һәм 50 филиалны тикшергәннәр. Бары тик Кама сәнгать- дизайн, Россия ислам, Казан менеджмент институтлары гына үзләре турында мәгълүмат тапшырмаган. Гому­мән, ил буенча вузларның 11,5 проценты бу тикшерүдән читтә калган. Андыйлар турында министрлык Рособрнадзорга шикаять язган. Ә тикшерү нәтиҗәләре буенча республикада 2 дәүләти вуз һәм дәүләтнеке булмаган уку йорт­ларының 13 филиалы “кара исем­лек”кә кертелгән. Болар – Әлмәт дәүләт муниципаль хез­мәте һәм Чаллы дәүләт сәүдә-технология институтлары, Көн­чыгыш икъ­ти­сад-юридик гуманитар акаде­мия­нең Әлмәттәге институты, социаль белем бирү академиясенең Буа, Арча, Алабуга, Тәтеш, Россия халыкара туризм академиясенең Идел-Кама, социаль-гуманитар белем бирү институтының Алабуга, Чаллы филиаллары, заманча гуманитар һәм хезмәт һәм социаль бәй­ләнешләр ака­демияләренең Казан филиаллары, Көнчыгыш икъ­тисад-юри­дик гуманитар акаде­миясенең Чаллы институты, Мәскәү со­циаль-гу­манитар ин­сти­тутның Казан филиалы. Моннан тыш 2016 елда Мәскәү мәдәният һәм сән­гать универ­ситетының Чаллы фи­ли­алының ябылуы, Казан ил­кү­ләм тик­шеренүләр техник уни­вер­си­тетының (КАИ) Бөгелмә филиалы, Казан дәүләт аграр университетын үзгәрешләр көтә. Соң­гы­сын Казан дәүләт ветеринария медицинасы университеты бе­лән берләштерү планнары бар.

ТР мәгариф һәм фән министры Энгель Фәттахов, студентлар саны 500дән дә ким булмаган филиаллар булмаска тиеш, дигән иде. “Без нәтиҗәсез эш­ләүче филиаллар белән көрәшеп калмыйча, республика карамагындагы начар күрсәткечләргә ия булган вуз­ларның язмышын да билгелибез”, – ди министр. Чаллы сәүдә-тех­нология институты ректоры Виктор Суворов белдергәнчә, алар­ның “кара исемлек”кә элә­гүенә вузда чит ил студентлары 5-7 проценттан да ким укымаска тиеш, дигән таләп сәбәпче. “Рособрнадзордан аккредитация мәсьәләсе буенча килгәч, алар бездәге үсешне Мәскәү дәүләт университетында да күрмәдек, дип бәя­ләделәр. Тик менә чит ил студентларының санын билге­ләүче күрсәткеч керткәннәр. Республика карамагындагы нор­ма­тив-финанслар 2-3 тапкыр ким булганда вузда алар каян булсын? Бирелгән ул акчага болай да ничек кирәк-алай белем бирү процессын алып барабыз. Чит ил студентларын кабул итә, үземне­келәрне анда җибәрә дә алмыйм. Монда мәгънә дә күр­мим”, – ди ректор ризасызлык белдереп.
Россия мәгариф министры Дмитрий Ливанов белдергәнчә, начар исемлеккә эләгүчеләрнең киләчәктә кимчелекләрне бетереп, төзәлү мөмкинлеге бар. Җитешсезлекләре табылган вузлар мәсьәләсе тагын бер кат ноябрь аенда ведомствоара ко­миссиядә тикшереләчәк. Менә шуннан соң гына ахыргы нәти­җәләр билгеле булачак.