Казан фәнни тикшеренү техник университетында машина төзелеше фәне үсешенә кагылышлы проблемаларга багышланган Халыкара конгресс

19-21 нче ноябрь көннәрендә А.Н.Туполев исемендәге Казан фәнни тикшеренү техник университетында “Машина төзелеше фәне өлкәсендәге мәсьәләләр һәм аның киләчәк үсеше”нә - аэрокосмик технологияләр, автомобиль төзелеше, энергомашина төзелеше, прибор төзелеше, мәгълүмати, инфокоммуникатив, радиоэлектрон технологияләргә багышланган Халыкара Конгресс узачак.
Конгресс кысаларында “Авиация, һава транспорты һәм энергетика үсеше (АНТЭ-2013)”, “Нигматуллин укулары – 2013” исеме астында халыкара фәнни-техник конференцияләр, шулай ук яшь галимнәр мәктәбе булып саналган “XXI Туполев укулары” исемендәге халыкара яшьләр фәнни конференциясе үтәчәк.
Конгресс эше барышында мастер-класслар, түгәрәк өстәлләр, төрле конкурслар уздыру, мәдәни программа планлаштырыла. Конференциядә рус һәм инглиз телләрендә чыгыш ясау мөмкин булачак.
Әлеге халыкара конгресс 2013 нче елда юбилейлары булган күренекле галимнәргә багышлана. Шушы елның гыйнвар аенда ТАССР Югары Советының элеккеге рәисе, РСФСРның фән һәм техника өлкәсендәге атказанган эшлеклесе, 1967 – 1977 нче елларда КАИ ректоры булып эшләгән Р.Ш.Нигматуллинның 90 яшьлек юбилее билгеләп үтелде. Июль аенда Рәсәй Федерациясенең фән һәм техника өлкәсендәге атказанган эшлеклесе, Рәсәй фәннәр академиясенең хакыйкый әгъзасы, җылылык энергетикасы өлкәсендәге галим В.Е.Алемасовка 90 яшь тулды. Ноябрь аенда СССРның генераль конструкторы, СССР Фәннәр Академиясенең академигы, самолетларны проектлаштыру мәктәбен башлап җибәрүче, университетыбыз аның исемен йөрткән А.Н.Туполевның тууына 125 ел тулуга багышланган тантаналы чаралар үткәрелде.