“Көтеп алынган укытучы” регионара конкурс

2013 нче елның 11 нче ноябреннән 14 нче ноябренә кадәр Пермь өлкәсенең “Оникс” көллиятендә һөнәри белем бирүче уку йортлары студентлары арасында “Көтеп алынган укытучы” регионара конкурсы үткәрелде. Әлеге чара Пермь өлкәсенең фән һәм мәгариф министрлыгы , һөнәри белем бирүче уку йортлары директорлары киңәшмәсе һәм Пермь төбәгенең “Оникс” көллияте тарафыннан оештырылды.
Конкурс укытучы һөнәренең кирәклегенә төшендерү, студентларның иҗади эшчәнлеген активлаштыру һәм булачак һөнәрләренә кызыксыну уяту максатыннан оештырылды.
Быел конкурс алтынчы тапкыр үткәрелде. Елдан-ел конкурсның георгафиясе киңәя һәм катнашучылар саны арта. Конкурста Пермь өлкәсенең һөнәри белем бирүче уку йортлары, Свердлов, Курган өлкәләре, Башкортстан, Татарстан һәм Бурятия республикаларыннан егерме дүрт студент катнашты. Татарстан республикасы данын Г. Тукай исемендәге Арча педагогия көллиятенең 5 курс “Е” группасы студенты Галимов Рүзәл Фәннур улы яклады.
Конкурс өч этапта үткәрелде. Беренче этапта катнашучылар үзләре турында “Яшьлек. Хыял.Уңыш” дигән презентация; икенче этапта “Яхшылык һәм матурлык дәресләре” дигән класстан тыш чаралар, ачык дәресләр; өченче этапта “Педагогик сандык” исемле мультимедия иҗади презентация күрсәтелде. Өч этапның нәтиҗәләре буенча “Иҗади эзләнү” номинациясендә I урын Галимов Рүзәлгә бирелде.