КНИТУ-КХТИ профессоры һәм башлангыч сыйныфлар укытучысы Мәхмүтов премиясе лауреатлары булды

2025 елның 15 сентябре, дүшәмбе

Сәламәтлек мөмкинлекләре чикләнгән балалар өчен Казанның 4 нче интернат-мәктәбенең башлангыч сыйныф укытучысы Эльвира Гарипова һәм педагогика фәннәре докторы, КНИТУ-КХТИ һөнәри һәм педагогик белем кафедрасы профессоры Петр Осипов 2025 елда М.И. Мәхмүтов исемендәге Дәүләт премиясе лауреатлары булдылар. Тиешле указга Татарстан Республикасы Рәисе Рөстәм Миңнеханов кул куйды.

Мирза Мәхмүтов исемендәге дәүләт премиясе 2017 елдан тапшырыла. Фәнни-методик эштә зур уңышларга ирешкән, педагогик кадрлар әзерләгән, мәгарифкә технологияләр керткән, дидактиканы һәм практик эшчәнлекне үстергән педагогик хезмәткәрләр лауреат була. Ел саен ул ике укытучыга бирелә. 2023 елда премиянең  күләме  100 мең сумнан 250 мең сумга кадәр арткан.