Юныс Әхмәтҗанов исемендәге кулинария мәктәбе ачылды
25 нче сентябрьдә Казан шәһәренең Габдулла Тукай исемендәге 1 нче татар гимназиясендә Юныс Әхмәтҗанов исемендәге кулинария мәктәбен ачу тантанасы булды.
2025 – 2026 нчы уку елында Габдулла Тукай исемендәге 1 нче татар гимназиясе, Казан азык-төлек һәм социаль туклану департаменты, Кече бизнес һәм эшмәкәрлек көллияте белән килешү төзеп, «Юныс Әхмәтҗанов исемендәге кулинария мәктәбе» проектын оештырды. Бу проект нигезендә 8, 9 сыйныф укучылары атнага бер тапкыр Кече бизнес һәм эшмәкәрлек көллиятенең укыту-лаборатория комплексында белем ала. 9 сыйныфны тәмамлаганда, алар 2 яки 3 разрядлы пешекче һөнәренә ия булу турында таныклык тапшырылачак.
Чара барышында гимназия директоры Гөлфия Гаязовна Шәмсиева катнашучыларны проектның максатлары, бурычлары белән таныштырды. Бу тантанада Татарстан Республикасы Мәгариф һәм фән министры урынбасары Минзәлия Заһри кызы Закирова, Казан шәһәре муниципаль берәмлеге Башкарма комитеты Мәгариф идарәсенең Вахитов һәм Идел буе районнары мәгариф бүлеге башлыгы Фәридә Илдар кызы Басыйрова, Вахитов һәм Идел буе районнары мәгариф хезмәткәрләренең профсоюз оешмасы рәисе Гөлнур Әхнәф кызы Шәрипова катнашты һәм чыгыш ясады.
Тантанада катнашучыларны «Казан азык-төлек һәм социаль туклану департаменты»ның ресурс үзәге директоры Гарифуллин Илфар Харис улы, директор урынбасары Полуэктова Наталья Викторовна, Кече бизнес һәм эшмәкәрлек көллияте директоры Силантьева Ольга Владимировна, директор урынбасары Андриянова Татьяна Петровна сәламләде.
Татарстан Республикасы Мәдәният министрлыгының массакүләм мәгълүмат чаралары һәм иҗтимагый оешмалар белән арадашлык бүлеге мөдире Айрат Шамил улы Фәйзрахманов тантанада катнашучыларга теләкләрен җиткерде.
Әлеге тантаналы чарада укучылар белән бергә ата-аналар комитеты рәисләре дә катнашты.