“Математика укытуда укучыларның фикерләү эшчәнлеген активлаштыру” темасы астында семинар-практикум

28 ноябрь көнне Куакбаш төп гомуми белем бирү мәктәбендә районыбызның башлангыч сыйныф укытучылары өчен “Математика укытуда укучыларның фикерләү эшчәнлеген активлаштыру” темасы астында семинар-практикум уздырылды. Мәктәп укытучыларының әлеге проблема өстендәге эшләре белән укыту-тәрбия эшләре буенча директор урынбасары Мөхәммәтҗанова З.М. таныштырды. Килгән кунаклар 3 сыйныфта “Мәйдан үлчәү берәмлекләре. Квадрат метр” (укытучы Ганиева Ф.Н.), 4 сыйныфта “Күбурынлы саннарны кушу һәм алуның язма алымнары” (укытуча Хәсәнова Ф.Г.) темасы буенча дәресләр, 1 сыйныфта “Йомры икмәк артыннан сәяхәт” темасы астында математикадан дәрестән тыш эшчәнлек чарасы карадылар. Яңа стандарт буенча дәрестән тыш чараның математика буенча сайлау, анда заманча информацион технологияләр куллану алымнары уңышлы булуы методик берләшмә җитәкчесе ГайсинаЗәлия Габделсаматовнаның“Математика укытуда укучыларның фикерләү эшчәнлеген активлаштыру” темасы буенча чыгышында ачык күренде.
Дәресләр балаларның танып-белү сәләтен үстерергә һәм мавыктыргыч итеп оештырылырга тиеш. Фикер йөртүнең аерым компонентларын (хәтер, игътибар, фараз итү һ.б.) һәм алар арасындагы бәйләнешләрне үстерүгә юнәлтелгән биремнәр системасы; сүзле уеннар (анаграмма, шарада, кроссвордлар,сүзләр чылбыры, табышмаклар һ.б.)- болар барысы да укучыларның кәефен күтәрә, баланың иҗат мөмкинлеген киңәйтә, интеллектуаль уеннардан канәгатьләнү алырга өйрәтә. Иң мөһиме - белем сыйфаты, эшнең нәтиҗәлелеге. Шул очракта гына укучының фән белән кызыксынуы арта, ул дәрестә алган белемне төрле ситуцияләрдә кулланырга өйрәнә, кыскасы, иҗади фикерләүче шәхес формалаша. Семинарда катнашучылар моңа инандылар.
Семинар мәгълумати-методик үзәк методисты Гаделшина Г.М.чыгышы белән тәмамланды.