Математика кирәк, математика мөһим

Шәһәрнең 4нче санлы урта гомумбелем бирү мәктәбенә узган атнаның җомгасында төгәл фәннәр мөгаллимнәре белән уку эшләре буенча директор урынбасарлары җыелган иде. Әлеге чара республикада игълан ителгән Математика елы һәм 4нче мәктәп базасында 2нче декабрьдән 9ына кадәр узган төгәл фәннәр атналыгы кысаларында оештырылган иде.
Кунаклар 6нчы, 7нче һәм 11нче сыйныфларда ачык дәресләрдә катнаштылар. Укучылар дәресләрен гадәти булмаган, мавыктыргыч формада үзләштерделәр. Әлеге сыйныфларның барысында да укытуның Сингапур алымы элементлары кулланылды. Бу да укучыларның әзерлекләре югары булуы турында сөйли. Директор урынбасары Рәзинә Әгъләмова сүзләренә караганда, укучылар үзләренең осталыкларын “Мультитест“, “Мавыктыргыч физика“, “Физик кафе“, “Мавыктыргыч саннар һәм фигуралар“ кебек конкурсларда сынап караганнар. Яхшыларның да яхшылары махсус бүләкләргә лаек булганнар. Укучылар “Вакыт машинасы“ исемле театраль тамаша белән дә кунакларны гаҗәпләндерделәр. Балалар борынгы Грециягә, Борынгы Руська, хәтта, киләчәккә дә “сәфәр кылдылар“. Барысы да “Математикасыз дөньяда яшәп булмый икән, аны ничек тә үзләштерергә кирәк,“–дигән нәтиҗәгә килделәр.
Семинарда мәктәпләрнең физика кабинетларын, лабораторияләрен җиһазлау, белем бирүнең сыйфатын күтәрү һәм укучыларны дәүләт йомгаклау аттестациясенә һәм бердәм дәүләт имтиханына әзерләү мәсьәләсе дә күтәрелде. Узган елларда районыбызның күрсәткечләре уртача республиканыкыннан югарырак булган. Киләчәктә артка чигенеш ясарга кирәкми. “Алга таба да яңа алымнарны кулланышка кыюрак кертергә кирәк. Сез балада үз фәнегезгә карата мәхәббәт уятырга тиеш. Бары шул очракта гына укучы яңадан яңа белемнәргә омтылачак,“–диде район мәгариф бүлеге мөдире Артур Ефимов.
Бүген еш кына хәзерге заман кешесенә математика нәрсәгә кирәк, компьютерлар һәм калькуляторлар математиканың мөһимлеген киметә, шуңа күрә аны өйрәнүнең әһәмияте юк, дигән сүзләр ишетергә туры килә. Әмма бу фәнне өйрәнүнең үз бурычлары бар. Күңелдән арифметик исәп-хисап ясау логик фикерләүне үстерергә булыша. Шуңа күрә, математика безгә дөрес фикерләргә, акыл эшчәнлегебезне стимуллаштырырга ярдәм итә, диелә ТР муниципаль берәмлекләре порталында урнаштырган хәбәрдә .