Быел җәен Казанның мәктәп яны лагерьларында 22 меңнән артык бала ял итәчәк
Казанда җәйге савыктыру кампаниясе башланып китте. 26 июньгә кадәр 160 белем бирү учреждениесе базасында мәктәп яны лагерьлары эшләячәк. Анда 7 яшьтән 17 яшькә кадәрге 22,5 меңгә якын бала ял итәр дип планлаштырыла. Бу хакта эшлекле дүшәмбе киңәшмәсендә шәһәр Башкарма комитетының Мәгариф идарәсе башлыгы Ирек Ризванов белдерде.
Эшләүче әти-әниләргә уңайлы булсын өчен балаларны 8:00дән 16:00гә кадәр кабул итүче дежур төркемнәр оештырылган. Сменаның дәвамлылыгы — 21 көн. Савыктыру юлламасының (путевка) тулы бәясе 6,1 мең сум булса, әти-әниләр өчен бәясе — 920 сум. Калган сумма Татарстан бюджеты исәбеннән түләнә.
Махсус хәрби операциядә катнашучыларның балалары өчен лагерьларда ял итү бушлай.
"Татар-информ" мәгълүмат агентлыгы материаллары буенча